Ibandla leMDC-T lithi amalungiselelo okutshengisela besola uhulumende NgoMqgibelo koBulawayo asefike esibangeni esiphezulu njalo bazatshengisela bengelamapholisa ngoba idale lomthethwandaba weHigh Court libavumele ukuba batshengisele.
UMabhalane oqoqa inhlelo zebandla leMDC-T, uMnu. Abednico Bhebhe uthi ababuyeli emuva ngokutshengisela NgoMgqibelo.
UMnu. Felix Mafa ongumsekeli wesikhulumi seMDC-T koBulawayo ukhuthaze ukuba abantu abasekela umbono webandla lakhe babasekele ngokuza labo bezotshengisela.
UMnu. Mandla Sibanda oyisikhulumi seMDC-T koBulawayo ugcizelele amazwi kaMafa.
Osakhulayo wakoBulawayo uNkosazana Dorcas Ncube ubike ukuba ukutshengisela okuqoqwa libandla leMDC-T uyakusekela ngoba inengi labasakhulayo alilamsebenzi njalo lempilo izinzima.
Injongo yokutshengisela lokhu kubalisa ukwala imali yamabond note, ukwazi nge iUS$15 billion ethiwa yanyamalala, imisebenzi eyi2.2 million eyathenjiswa libandla elibusayo leZANU-PF lokuthi uhulumende kayeke umkhuba omubi wokuphazamisa ukusebenza kwamakhansili ezweni.
Akukazakali ukuthi umongameli weMDC-T, uMnu. Morgan Tsvangirai uzaphatheka ekutshengiseleni lokhu na ngoba usesibhedlela kwele South Africa.
Uzulu oxoxisane leStudio 7 ubike ukuba ibandla leMDC-T alisebenise idale lePhalamende ukumemezela izikhalazo zabo ngoba ukutshengisela kuvame ukungalethi inguquko ngoba ibandla leZANU-PF liyathokoza uma ilizwe limi manzonzo kulendlala abantu beswela imisebenzi lemali.
NgoLwesithathu ibandla leZanu PF litshengisele inkulungwane zabasekeli zangena ezitaladeni zeHarare zisithi zitshengisela usekelo lukaMongameli Mugabe.
Kunjalo nje ukuhlaziya ukutshengisela lokhu kwabe MDC-T uPraxedes Jeremiah uxoxe lomnumzana Abednigo Bhebhe obona ngokuqoqwa kwenhlelo zebandla leli elomnumzana Vumani Ndlovu obona ngokuqoqwa kwenhlelo zenhlanganiso yabemaphandleni eye Rural communities trust. Umqali siziba kunguBhebhe.