Abeqembu lenguqu yabesifazana elamaMighty Warriors bathi ikusasa yaleliqembu inhle loba nje libhekane lenkinga yokungatholi usekelo lwemali.
Ekhuluma ekupheleni komdlalo weqembu le Mighty Warriors lele Tanzania ngeSonto edluleyo, oweluleka abaqeqetshi beqembu leli uBarry Daka uthe kuqakathekile ukuba amantombazana eZimbabwe eyale elokhu edlala ibhola langesikhathi lapho abayabe bengekho khona kuqembu lesizwe.
"Amantombazana ethu ayatshengisela sibili ukuba nxa bengahlala bezilolonga loba bengekho kuqembu lesizwe istandard sabo singakhwela siye phezulu.
Iqembu le Zimbabwe lidlulele kusigaba esilandelayo esomcintiswano wokudinga amaqembu azakuyaphatheka kumidlalo ye Africa Women Cup of Nations ngemva kokunqoba ele Tanzania nge 3 ka 2 nxa kuhlanganiswa impumela yemidlalo emibili edlalwe yilawa maqembu.
Lokhu kutsho ukuba iqembu lama Mighty Warriors lizadibana leqembu elimela ilizwe leZambia kumidlalo emibili ngenyanga ezayo njalo iqembu elizaphumelela lapho yilo elizathola ilungelo lokuyadlala kuma finals azaqhutshelwa elizweni le Cameroon ngenyanga kaLwezi.
Umqeqetshi weqembu lama Mighty Warriors uShadreck Mlauzi uthi yena bazakwenza konke okusemandleni abo ukuba befinyelele ukuyadlala kumncintiswano we Africa Women Cup of Nations.
"Engingakutsho yikuba abasekeli bethu abakhangelele ukuba sizaqhubeka siphakamisela iflag yelizwe phezulu ngoba siliqembu elifuna lathi ukuba sikhangelelwe phezulu.
Umdlalo wakuqala phakathi kweqembu le Zimbabwe lele Zambia uzakuba khona phakathi kwamhlaziyithoba minwe mbili lamhla zilitshumi kunyanga kaMabasa njalo uzadlalelwa kwele Zambia.
Owesibili uzakuba khona phakathi kwa mhla zingamatshumi amabili lambili lamhla zingamatshumi amabili lane kuyo njalo inyanga kaMabasa.
Imvimbi yeqembu le Mighty Warriors uNobuhle Majika uveze ithemba lokuba amaphupho abo okuyaphatheka kumidlalo yokudinga intshantshu zezwekazi lase Africa azafezeka.
"Emdlalweni olandelayo sizadlala leqembu le Zambia njalo sifuna ukusebenza nzima ngoba nxa sibambene akulanto engasehlula.
Amantombazana adlala kuqembu lama Mighty Warriors avele kumele ayedlala kumidlalo yama Olympics ngenyanga ka Ncwabakazi njalo konke lokhu bakwenza loba nje bengatholi usekelo lwemali.
Abadlali beqembu le Mighty Warriors baphiwe ithuba lokuyabona imuli zangakibo ngemva komdlalo wabo leqembu le Tanzania njalo bakhangelelwe ukubuthana njalo ngeSonto ezayo.
