Amankampani amanengi eZimbabwe athi asebanjwa ngamandla yi Zimbabwe Electricity Supply Authority (ZESA) ukuthi abhadale umthelo kamagetsi okhuphukileyo ukwenzela ukuthi angacitshelwa umlilo kagetsi okwesikhathi eside.
Iphephandaba le Herald lithi amankampani la athi iZESA ifuna abhadale umthelo we 13 cents per kilowatt hour kule 7 cents ayibhadala okwamanje.
Amankampani la athi angathenga umlilo kagetsi ngomthelo ophezulu azehluleka ukwenza impahla kumbe azakhuphula intengo yempahla ayilungisayo.
Athi njalo ayethuselwa ukuthi nxa engathengi umlilo kagetsi ngemali ephezulu, alakho ukuvalelwa ugetsi okwedlula amahola amane kusiya kumahola alitshumi lane.
Aphinde athi lokhu kuyabethusa ngoba iZesa ifuna ukwenza imali ngendlela ezitshiyeneyo.
Kodwa-ke isikhulumeli seZesa uMnu. Fullard Gwasira uthi amankampani kawabanjwa ngamandla ukuthi athenge umlilo kagetsi nge 13 cents a kilowatt hour.
UGwasira uthi lawo athenga umlilo lo ngemali ephansi alakho ukucitshelwa amagetsi okwesikhathi eside.
Kusenjalo, inhlanganiso ye Harare Residents Trust ithi isithethe isinqumo sokuthi izakhamizi zingabhadali umthelo womlilo kagetsi okhuphuka nge dollar ngolweSine.
Kodwa-ke uNkosazana Magodonga Mahlangu ongomunye wabaqondisi be Women of Zimbabwe Arise uthi nhlanganiso yakhe ibe lomhlangano ovula ingqondo leziphathamandla ze ZESA eHarare ngolweSibili.
