Ugatsha lwezemali lumanyene lebhanga elikhulu lelizwe iReserve Bank of Zimbabwe solwethule isinqumo esithi inkampani ye Rainbow Tourism Group le Afre Corporation sokumele amiswe ukuthengisela uzulu amashares emkambo wemali owe Zimbabwe Stock Exchange ngenxa yokuthengiselana amashares ngudlu.
Umkambo lo wemali ubikwa usutsheliwe ukuthi akumelanga amankampani la athengise amashares kungakahloliswa loludaba ngokugcweleyo.
Umthetho wokuthengiselana amashares owe Securities Act kawuvumeli ukuthi amankampani afonelane ngudlu kumbe atshelane ngasese ngesimo senotho yawo kungakathengiselwana amashares ku Zimbabwe Stock Exchange.
Ingcwethi kwezenotho uMnu. Masimba Kuchera uthi kumele kuphele ukuthengiselana ngudlu amashares emkambo we Zimbabwe Stock Exchange.