Amankampani emigodi eZimbabwe athi asehambise kuhulumende ingwalo ezijulileyo ebezifuneka ngoMvulo eziveza ukuthi azakwabela abansundu amashares kuhlelo lwe Indigenization.
Abaqondisi bamankampani anjenge Zimbabwe Platinum Holdings alemigodi emba iplatinum kanye labe Caledonia Mining Corporation emba igolide athi anike uhulumende ingwalo lezi ezitshengisa ukuthi amashares angathengwa nguzulu angeke edlula isilinganiso sokungamatshumi phose amathathu ekhulwini-26%.
Omunye walabaqondisi uMnu. Stefan Hayden, owe Caledonia Mining Corporation yase Canada emba igolide eBlanket Mine eGwanda esabelweni se Matabeleland South, uthi inkampani yakhe ingeke yehlukana lama shares afunwa nguhulumende angaba yisilinganiso sokungamatshumi amahlanu lanye ekhulwini-51%.
Omele iZimbabwe Platinum Holdings uMnu. Patrick Maseva Shayawabaya uthi inkampani yakhe yahambisa kudala kuhulumende ugwalo olufunakalayo kodwa akaboni ukuthi bazanika uzulu amashares afunwa nguhulumende.
Umphathintambo wezamafekithali uMnu. Welshman Ncube uthi ingxenye kahulumende ebanjwe libandla lakhe kayazi lutho ngelanga elifakelwe amankampani la ukuthi abele amashares uzulu.
