Ikhomithi yedale lephalamende ebona ngokusetshenziswa kwemali kahulumende ithi amankampani emazweni athole imisebenzi eminengi kahulumende lonyaka ebiza izigidi ezedlula amakhulu amahlanu eMelika.
Umnu. Paddington Zhanda umgcinisihlalo wekhomithi le utshele idale lephalamende ukuthi imsebenzi eminengi enikwe amankampani emazweni inengi lawo ngawe China kwathi-ke awe Zimbabwe akha phansi.
UZhanda uthi lokhu akuvunyelwa ngoba imsebenzi enjengokwakha izindlu emzini we Willovale eHarare kanye lokulungisa amadamu engcekeza eBeitbridge bekumele kwenziwe ngamankampani eZimbabwe.
Uphinde wathi kumele uhulumende anike imisebenzi le amankampani eZimbabwe ukwenzela ukuthi aphandele uzulu okokuziphilisa njalo kwenqatshelwe udubo lokuthi imali etholakala eZimbabwe isetshenziswe ukuthenga okokwakha lokunye emazweni.
Ingcwethi kwezenotho uMnu. Daniel Ndlela uthi idale lephalamende kumele lethule imithetho yokuncedisa amankampani eZimbabwe ukuthi athole imisebenzi kahulumende kodwa lokhu akumelanga kwenzelwe ukuvalela amankampani emazweni akwazi ukwenza imsebenzi eqhotho kumbe alobuncitshi obuphezulu kulowo msebenzi.
