Amapholisa akoBulawayo abikwa etshise amaKombi amabili enzikini yedolobho ngoLwesithathu ngemva kokuwagijimisa ewethesa umlandu wokusebenza ngaphandle komthetho.
Ababone lokhu kusenzakala bathi amapholisa la ajikele i-teargas phakathi kwamaKombi lawa, asebaleka lapho enanzelela ukuthi ebesedale ingozi.
Amapholisa kulelidolobho athwalise imitshova eminengi gadalala ngoba esithi ayibhalisanga ukuthi isebenze iphansi kwenkampani kahulumene iZupco.
Isikhulumeli samapholisa koBulawayo uMnu Abednico Ncube utshele iStudio 7 ukuthi ubengakezwa lutho ngalesi sehlakalo.
Isiphathamandla senhlanganiso yeBulawayo Progressive Residents Association uMnu Thembalani Dube yena othi uzibonele ngawakhe lokhu kusenzeka uwasolile kakhulu amapholisa esithi akwenzileyo ekumelanga kuvunyelwa lanxa sokutheni.
