amalinks wokungena

Kuqhubekela phambili ukubotshwa kanye lokuhlukunyezwa kwabaphila ngokuthengisa ezitaladeni zasenzikini yedolobho leHarare.

Lalabo abathengisela endaweni ezibikwa zisemthethweni labo bakhala ngokuhlangana lenkinga ezokungatholi abazothenga.

Bekungesikamangoye legundwane njalo ngoLwesibili lapho amapholisa akade ekhaphane lakamanisipala abebhoda ezitaladeni bethwele imvubu kanye lentuthu ehitshayo begijimisana labaphila ngokuthengisa.

Intatheli zeStudio 7 zizibonele ngawazo amapholisa ebopha kanye lokutshaya abathengisa impahla zokugqoka ezimoteni zabo kuzitalada eziseduzane lendawo eyazakala kakhulu enzikini yalelodolobho eyeXimex Mall.

Amapholisa abhode indawo yonke enzikini yedolobho leHarare edinga abathenga bethengisa impahla.
Amapholisa abhode indawo yonke enzikini yedolobho leHarare edinga abathenga bethengisa impahla.

UMnu. Timothy Msimanga, omunye wabaphila ngokuthengisa impahla yokucecisa emoteni, uthe bayakhahlanyezwa ngamapholisa.

UMnu. Benson Takawira, ophila ngokuthengisa okusemthethweni impahla ezifana lezigqizo, amawatshi kanye lempahla esebenzisa amandla kagetsi, uthe bagonjolozwe ngamapholisa wabotshwa wazam ukweqa emoteni yamapholisa.

Omunye umama osebenzela eHarare, uNkosikazi Sazini Siziba, uthe ukuxotshaniswa akwenziwa ngamapholisa kuyamethusa ngoba yena ebhalise ngokusemthethweni.

Amapholisa asuse abantu abanengi ezitaladini eHarare abathenga bethengisa impahla etshiyeneyo.
Amapholisa asuse abantu abanengi ezitaladini eHarare abathenga bethengisa impahla etshiyeneyo.

UMnu. Mfundo Mlilo, ngumqondisi wenhlanganiso yezakhamizi zase Harare, eye Combined Harare Residents Association ehlaziya njalo ezombusazwe, uthe kabavumelani lokuhlukunyezwa kwalabo abaziphandelayo.

Ukubotshwa kwabaphila ngokuthengisa ezitaladeni kulandela iziqondiso zikaMongameli Robert Mugabe ensukwini ezisanda kwedlula othe laba bantu behlisa ukuhlanzeka kwedolobho ikanti-ke bephazamisana uzulu ohamba ezitaladeni.

Amabandla aphikisayo wona athi alethemba lokuthi lokhu kuzakwenza ukuthi abaphila ngokuthengisa bananzelele ukuqakatheka kokubhalisa ukuvota ngomnyaka ozayo ukususa umbuso obahlukumezayo.

Facebook Forum

XS
SM
MD
LG