Amapholisa ako Bulawayo asebophe uMnu. Albert Mhlanga omela umuzi wePumula koBulawayo edale lephalamende esetheswa icala lokutshaphaza imali yokuthuthukisa izabelo eye Constituency Development Funds-CDF.
UMnu. Liberty Mcijo igqwetha lika Mhlanga uthi amapholisa abophe insizwa le ngoLwesine emiswe phambi komthethwandaba ngoLwesihlanu lapho ahalwuliswe imali yesibambiso eye Bail yamakhulu amane amadollar-$400.
UMcijo uthi uMhlanga ucatshangelwa ukuthi wasebenzisa okungekho emthethweni inkulungwane ezingaba ngamatshumi amane zamadollar.
Uthi amapholisa athi wafaka eyinye imali ebhukwini lakhe lebhanga wasethatha eseleyo wayibambisa abangane bakhe esenzela ukuthi afihle indlela asebenzisa ngayo imali ayinikwa nguhulumende yokuthuthukisa uzulu.
Uhulumende wanika amalunga edale lephalamende inkululwane ezingamatshumi amahlanu amadollar eMelika.
Amalunga anjengo Mnu. Marvellous Khumalo omele iSt. Mary’s kanye loMnu. Franco Ndambakuwa basanda kwetheswa icala elifanayo.
IStudio 7 ike yaxoxa lo Mhlanga engakabotshwa ngoLwesibili othe amalunga edale lephalamende angasebenzisanga kahle imali yokuthuthukisa izabelo kumele abotshwe.
UMnu. Lovemore Moyo umlawuli wedale lephalamende uthi kulungile okwenziwa ngamapholisa le Anti-Corruption Commission.
Kusenjalo, umhlangano wamalanga amabili obuse Johannesburg wokukhankasela ukusungulwa kwamabhizimusi eZimbabwe, ugqitshwe ngoLwesihlanu.
Intathelizindaba ye Studio 7 uBenedict Nhlapho ubika ukuthi iziphathamandla zikahulumende zikhuthaza abalemali zabo ukuthi bamanyane lohulumende ekuvuseleleni amakampani abhekane lohlupho olukhulu lwemali.
