Inkokheli yenhlanganiso yezifundi eye Zimbabwe national Students union (Zinasu) ibotshiwe ngamapholisa eUniversity of Zimbabwe (UZ) lapho ekade iqhuba umhlangano lezifundi kuhlafunwa udaba lwembadalo yama tuition fees lokungatholakali kwezindlu zokuhlala zabafundi.
Umnu. Joshua Chinyere labanye bakhe abathathu kanye labafundi abayisithupha babotshwe ngamapholisa eUZ batshaywa bengakahanjiswa enkambeni yamapholisa eAvondale eHarare.
Umnu. Mfundo Mlilo umkhokheli wenhlelo zeZINASU utshele uGibbs Dube we Studio 7 ukuthi abanye abafundi ababotshiweyo balimele.
Kusenjalo, olunye uhlangothi lweZINASU lwenze ukhetho lwenkokheli ngempelaviki lapho okukhethwe uMnu. Tafadzwa Mugwadi weUniversity of Zimbabwe ukuthi abe ngumongameli wenhlanganiso le kwathi-ke uMnu. Obert Masarahuro owe Midlands State University wathola isikhundla sokuba ngumsekeli wakhe.
Umnu. Kurai Hove owe National University of Science and Technology nguye osengunobhala jikelele, uMnu. Welcome Zimuto owe Chinhoyi University engumsekeli wakhe. UMnu. Kudakwashe Chakabva owe Harare Polytechic ukhethwe ukuba ngunobhala obona ngokwethulwa kwemibiko, uMnu. Tafadzwa Kutya owe Great Zimbabwe University waba ngumgcinisikhwama, kuthi-ke uMnu. Rodline Ushewokunze owe Bulawayo Polytechnic walhethwa ukuba ngunobhala obona ngobudlelwano bale inhlanganiso lezinye inhlanganiso zomhlaba.
Isikhundla sikanobhala obona ngenhlelo zomthetho sitholwe nguMnu. Archiford Mudzengi weBulawayo School of Mines kwathi-ke uNkosazana Sharon Manjere owe Bindura University of Science Education waba ngunobhala obona ngendaba zemidlalo lenhlelo zokuzilibazisa.
