amalinks wokungena

Breaking News

Amapholisa Abopha Umhleli we Sunday Mail


UKudzayi ubikwa esetheswa amacala abalisa ukufuna ukugenqula umbuso weZanu PF, lokweyisa amandla kamongameli Robert Mugabe.

Amapholisa eHarare ngoLwesine abophe umhleli wephephandaba le The Sunday Mail uMnu. Edmund Kudzai njalo babikwa bedinga umhleli wephephandaba le Zimbabwe Independent, uMnu. Dumisani Muleya.

Kuthi koBulawayo indlu yomhleli wephephandaba le The Chronicle uMnu. Mdudzuzi Mathuthu igqekezwe ngabantu abangaziwayo bathatha impahla etshiyeneyo egoqela umabonakude, ukudla kade kusendlini makhaza, ifiriji Kanye lempahla zokugqoka.

Iphephandaba lebulenjini ele Herald lithi amapholisa kade ehlome ngemibhobho angene ngamandla ehofisini ka Kudzayi evelamswela emzini wakhe athatha impahla etshiyeneyo egoqela umakhalekhukwini, imitshina yama computer le DVD ebilotshwe ukuba ngeyomhlangano webandla leMDC-T.

Lanxa iStudio Seven yehlulekile ukukhuluma lamapholisa ngaloludaba abazi ngokwenzakalayo bathi uKudzayi ucatshangelwa ukuthi nguye owazakala ngokuthi nguBaba Jukwa ebulenjini be Facebook. Bathi njalo wetheswa amacala abalisa ukufuna ukugenqula umbuso weZanu PF, lokweyisa amandla kamongameli.

Kuthi emahofisini ephephandaba le Zimbabwe Independent amapholisa abikwa engene athi adinga umhleli uMuleya yena okukhefu kodwa bala ukuchaza ukuthi bamfunelani. Kodwa iziphathamandla ze Independent kazivumanga ukupha ikheli ka Muleya.

Izehlakalo lezi zilandela imbiko kaMongameli Robert Mugabe lapho ethuka umphathintambo wezokwethulwa kwembiko, uMnu. Jonathan Moyo ngokuqatsha abahleli bamaphepha kahulumende ababethuka ibandla le Zanu PF bengakalisebenzeli.

Unobhala jikelele wenhlanganiso yentathelizindaba, uMnu. Foster Dongozi utshele iStudio Seven ukuthi bayadaniswa kwakhulu yilesi sehlakalo.
XS
SM
MD
LG