Ibandla leMDC selisole kakhulu elithi yikuthunjwa kukaRetired Lieutenant Colonel, Elliot Piki ngeSonto ngabantu abacatshangelwa ukuthi yiziphathamandla zikahulumende ezaziwayo.
UMnu. Piki ubikwa wethula ugwalo oluveza ukuthi ibandla leZANU PF lilomlandu ekudutshulweni kwabantu abayisithupha labanye abalimalayo mhla ziku 1 kuNcwabakazi ngemva kokhetho lonyaka.
Lanxa ibandla leMDC lisithi uMnu. Piki bekufanele afakaze phambi kwekhomishini edingisisa ngokudutshulwa kwabantu, isikhulumeli sayo uMnu. John Masuku ulandule lokhu. Isikhulumeli samapholisa uNkosikazi Charity Charamba uthi amapholisa azisiwe ngaloludaba njalo asadingisisa ngalo.
Amagqwetha alwela ilungelo loluntu abikwa esethule loludaba emthethwandaba ukuthi ubambe ngamandla amapholisa ukuthi adinge uPiki.
Kunjalo nje, omunye wabasekeli bakaMnu Nelson Chamisa kubandla leMDC, uMnu. Elias Mudzuri, uhlaselwe ngabebandla lakhe abangamalunga edale lephalamende ngoMvulo ngemva kokuyahlangana loMongameli Emmerson Mnangagwa estate house. UMudzuri, ongumkhokheli weMDC kudale leSenate, uthi uhambe kuMnangagwa ngoba ubenxusiwe ndawonye lezinye iziphathamandla zeSenate. Ubenguye yedwa ilunga leMDC.
Abahlasele uMudzuri emphakathini laba bagoqela uMnu Murisi Zvizvai loMnu. Charlton Hwende besithi ngokuya estate house, uMudzuri unanze uMnangagwa njengomongameli welizwe, okuyikho okuphikiswa yiMDC.Bathi kuyabamangalisa ukuthi uMudzuri ubesiyadingani, ikakhulu ngemva kokududulwa lokuhlukuluzwa kwamalunga emdc ephalamende ngeviki edluleyo ngemva kokwala ukusukumela uMnangagwa. Kodwa uMnu. Mudzuri wethule umbiko esithi ubengananzi uMnangagwa njengomongameli, kodwa eqhuba umsebenzi njengoSenator.
Kusenjalo, ibandla leMDC lithi lizatshengisela ngoLwesine kuyonale iviki eHarare lisola ukubhidlika komnotho welizwe kanye lenhlelo zikahulumende ezifana lemithelo ethile, ezibangela ukuthi impilo yabantu ibe lukhuni ngamandla.
Isikhulumeli salelibandla uMnu. Jacob Mapfume ubikwa esithi ibandla lakhe selazise amapholisa ngalelinyathelo. Ngemva kokutshengisela eHarare, amalunga e MDC akhangelelwe ukuya kwezinye izigaba zelizwe.
Ukuze sizwe okunengi ngaloludaba, sixoxe loMnu. Nkululeko Sibanda, isikhulumeli sikamkhokheli weMDC uMnu. Nelson Chamisa.
