Udokotela Peter Magombeyi onyamalale ngoMgqibelo, watholakala ngoLwesine ntambama eseNyabira, usiwe esibhedlela seAvenues Clinic eHarare, lapho ayelatshwa khona. Amapholisa agcizelele ukuthi ngempela utholakele kodwa abakakhulumi laye njengoba esahlolwa ngodokotela.
Isikhulumeli samapholisa aweZimbabwe Republic Police, u-Senior Assistant Commissioner Paul Nyathi utshele umsakazo oweStudio 7 ukuthi abemuli sebembonile okuyikho okuqakathekileyo njalo akabotshwanga bazathanda ukukhuluma laye ukuze bazwisise udaba lwakhe ukuthi usuke njani emzini weBudiriro azobonakala eseseNyabira.
“Namhla ekuseni uhlangane lamadokotela labana esibathi ngamapersonal doctors, njalo uhlangane lamadokotela lawana esiwathi ngamadotela awe Government Medical Team, so amadoctors lawa azasinika I report. Yena khathesi uhlangane labemuli yakhe, uhlangane lamagwetha akhe, usesibhedlela, uyaphila njalo amadokotela asazitshela ukuthi uphuma nini esibhedlela” kutsho uNyathi.
Uqhubeke uNyathi ethi, “Ingamanga imibiko yokuthi sike saxabana lamalawyers, into esimangalisayo yikuthi kulamalawyers amanengi afike esithi they are representing uMagombeyi, but yena uMagombeyi uthi ulelawyer one. So sicela kakhulu wona amalawyer ukuthi akhulumelane abe le one team.”
