Amapholisa akade ehlome kanzima ngemibhobho amanye elezinja, ahanqe amahofisi ebandla le Zapu koBulawayo axotsha abantu bonke abakade bephakathi ngolweSihlanu.
Lokhu kulandela isinqumo esiphiwe ngumahluli, uNkosikazi Nokuthula Moyo, esokuthi abebandla leZapu bavunyelwe phansi komthetho ukungena ezithaladeni betshengisela.
Abebandla leli badinga ukutshengisela okunjengalokho obekuqoqwe ngumanyano wamabandla ezombusazwe aphikisayo oweNational Electoral Reform Agenda -NERA kodwa kwamiswa eHarare.
Umsekeli wesikhulumeli sebandla leZapu, uMnu. Iphithule Ncube utshele iStudio Seven ukuthi okwenziwe ngamapholisa lokhu yikwephula umthetho lamalungelo abantu njalo basadingisisa ukuba babone ukuthi bengathatha nyathelo bani phansi kwesisekelo sombuso welizwe.
"Uma nxa sikhangela indlela aziphathe ngayo amapholisa, akukho emthethweni. Kuzamele sikhonone sitshengise ukuthi asijabuli ngendlela abasiphathe ngayo ngoba amahofisi eparty yiprivate property abangamelanga bayiphathe ngendlela abayiphathe ngayo" kutsho uNcube.
