Abathenga bethengisa impahla etshiyeneyo eHarare bajikijele amapholisa ngamatshe bawaxotshanisa ngesikhathi ezama ukubasusa emigwaqweni kulandela ukuqhamuka komkhuhlane wesihudo osubulele abantu abafika amatshumi amathathu lambili (32).
Amapholisa abebembisana lawekhansili yeHarare engaphansi komanyano weMovement for Democratic Change Alliance.
UMayor wedolobho leli, uMnu. Herbert Gomba, utshele intathelizindaba ukuthi kazi lutho ngokwenzakale eHarare phakathi kwabathenga bethengisa impahla lamapholisa azame ukuthi kunqabelwe ukungamemetheki komkhuhlane weCholera.
Abasakhulayo abakade bethwele amatshe baxotshanise amapholisa la abegade izimota.
Abatsha laba bacine betshaya ezinye izakhiwo eHarare ngamatshe okugoqela isigodlo sekhansili.
Osomabhzimusi abanengi bacine bevala amavinkili abo besesaba ukuthi bangagongodwa ngabathenga bethengisa impahla.
UNobhala wedolobho leli, uEngineer Hosiah Abraham Chisango, uthi ikhansili izazama ukwakha indawo lapho abathengisa emigwaqweni abazasebenzela khona.
Uphathintambo wezabelo, uMnu. July Moyo, uthe basusa abantu laba ukwenzela ukulwisana lomkhuhlane wesihudo hatshi ukubakhahlameza.
Omunye wababone iziphithiphithi sekujikijelanwa ngamatshe phakathi kwamapholisa labaphila ngokuthengisa laba eHarare, uMnu. Nkosikhona Dibidi, usole inkulumo yeziphathamanda zikamanisipala le ezilandule ngokutshayana kwamapholisa labathengisa emigwaqweni.
