Ababengabameli besigodlo seMelika eZimbabwe, isiphathamandla seHarvard University, abalwela ilungelo loluntu, labanye; sebelobe ugwalo lwe petition besithi ikolitshi leHarvard kufanele lesule inhlonipho elisanda ukuyipha unkosikazi kamongameli uAuxillia Mnangagwa ngenxa yokwephulwa kwelungelo lika dokotela Peter Magombeyi yena othi wayethunjiwe ngeviki edluleyo, njalo owelatshwayo esibhedlela.
Basole ukuthunjwa kwabantu okusanda ukwenzakala kunyanga ezedluleyo, njalo bathi kusobala ukuthi uhulumende weZimbabwe nguntando kayiphikiswa.
Kusenjalo, amapholisa ngoLwesibili ebusuku akhweze emthethwandaba isicelo sokuphikisa isinqumo sokuvimba uDokotela Peter Magumbeyi ukuthi ayekwelatshwa esibhedlela se South Africa.
Amapholisa ayethe uMagombeyi, owabonakala ngemva kwamalanga amane enyamalele, kabotshwanga kodwa izolo kuthe sokufanele aye eSouth Africa amapholisa amvimba, okubangele ukuthi amagqwetha aye emthethwandaba oyiwo owamnika imvumo yokuthi ayekwelatshwa.
NgoLwesibili ebusuku amapholisa athe kumele loludaba lwehlulelwe ngokuphazima kweso.
Ukuhlaziya loludaba, sixoxa lengcwethi ecubungula ezelungelo loluntu, uMnu. Bekezela Maduma Fuzwayo.
