WASHINGTON DC —
Amapholisa eDenver, esigabeni seColorado kweleMelika, athi aphakathi kokuphenya udaba lomunye owesilisa ovuke ubhova ngoMvulo wadubula abantu abane bafa njalo walimaza abathathu.
Umsolwa ube ngowesihlanu ukufela kusehlakalo lesi ngemva kokudutshulwa ngamapholisa.
Isikhulumeli samapholisa uMnu Paul Pazen utshele intathelizindaba ukuthi basadingisisa ukuthi kahle-kahle kungani umsolwa enze isiga esinje.
Ukudutshulwa lokubulawa kwabantu eMelika kuyinsakavukela ngoba imbhobho itholakala kalula.
Ohlaziya ezombusazwe uMnu Khanyisani Ncube utshele iStudio 7 ukuthi kulesidingo sokuthi kuhlalwe phansi kuqedwe loludlakela ngoba ludlange kakhulu elizweni.
