amalinks wokungena

Amapholisa Ensitha Awe CIO Emba Efihla Amadayimana eMarange: Global Witness

  • Gibbs Dube

Eyinye yenhlanganiso zokulondolozwa kwelungelo loluntu emhlabeni jikelele eye Global Witness, ithi abohlangothi lwamapholisa ensitha abe Central Intelligence Organization (CIO) abacatshangelwa ukuthi bemba befihla amadayimana eMarange abamhloniphi ngitsho lakancane uhulumende we Zimbabwe.

IGlobal Witness ithi izame ukudingisisa indlela okwenjiwa ngayo amadayimana yi Anjin Investments (Pvt) Limited yafumana ukuthi amasotsha lama CIO bazenzela santando.

Ugwalo olujulileyo olwethulwe yiGlobal Witness luthi iAnjin idlelana lenkampani okuthiwa yi Matt Bronze elabaqondisi abangaziwayo ukuthi basebenza ngaphi.

Abaqondisi laba nguMnu. Shelton Wandai Kativhu loNkosazana Pennelope Rujeko ababikwa bengela lwazi lokwemba amadayimana.

Inhlanganiso le iphinde yathi iAnjin ilomqondisi oyedwa oyisiphathamandla sikahulumende uMnu. Charles Tarumbwa ongu brigadier-general kubutho le Zimbabwe. Abanye yinzalo yakwele China ababambe amashares amalutshwana kunkampani le.

Labo abaku board ye Anjin ngabamele amasotsha lamapholisa eZimbabwe.

Ngabaqoqela uMnu. Martin Rushwaya onguPermanent Secretary kugatsha lwezomvikela, uMnu. Oliver Chibage onguskomitshi wamapholisa, uMnu. Munyaradzi Machacha umqondisi wezembiko kubandla le Zanu-PF, uMnu. Morris Musunungure owayekubutho le Zimbabwe National Army loMnu. Romeo Daniel Mutsvunguma ocatshangelwa ukuthi wahlukuluza uzulu kusenziwa ukhetho ngomnyaka ka 2008.

IGlobal Witness ithi okuhlasimulisa umzimba njalo yikuthi kulabaqondisi abanye abaku CIO abakunkampani ye Sino Zimbabwe Development Limited abacatshangelwa ukuthi basanda kuthola izigidi ezilikhulu zamadollar eMelika - $100 million evela kuMnu. Pam Sa ongusomabhizimusi we Hong Kong.

Umnu. Pam ucatshangelwa ukuthi wanika ama CIO imali le esenzela ukwenza uhlelo oluthiwa yi Operation Spiderweb lokululaza inkokheli yamabandla eMovement for Democratic Change abusa lebandla le Zanu PF.

Abadlelana loMnu. Pam kunkampani le bacatshangelwa ukuthi nguMnu. Gift Kalisto Machengete, uMnu. Pritchard Zhou kanye loMnu. Masimba Ignatius Kamba abakuhlangothi lwamapholisa lwensitha.

IGlobal Witness ithi kumele iSouthern African Development Community, ingenele edabeni lolu olwenza ukuthi kube lokuxabana kuhulumende womanyano.

Asenelisanga ukukhulumisana leziphathamandla ze Sino Zimbabwe Development kanye labaqondisi benkampani ye Anjin.

Umnu. Obert Mpofu umphathintambo wezemigodi uthi kungamanga okwethulwe yi Global Witness.

Umnu. Walter Mbongolwane ingcwethi yezenotho ezimele yodwa uthi ugwalo olwethulwe yi Global Witness luyitshaye ekhaleni.

XS
SM
MD
LG