Amapholisa athi umthetho wePublic Order and Security act (POSA) akufanelanga uguqulwe njengalokhu okulotshwe kusisekelo sombuso esitsha ngoba umthetho lo uvikela abantu abangaphatheki ekutshengiseleni okwande ukwenzakala elizweni ngakho ulondoloza ilungelo loluntu.
Lokhu kuvezwe yisiphathamandla samapholisa uAssistant Commissioner Takawira Nzombe ekhuluma phambi kwedale lephalamende elibona ngokunanzwa kwamalungelo oluntu.
UMnu. Nzombe wengezelele wathi kufanele kuguqulwe umthetho obenqabela ukuthi bevalele isibotshwa esitokisini okwamamalanga edlula amabili -48 hours-singamiswanga phambi komthethwandaba, ikakhulu emaphandleni lapho okulemithethwandaba yama circuit courts ehlala kanye kumbe kabili kuphela ngeviki.
Uphinde wathi ngabe akwesulwanga umthetho ophathelande lokubulala umuntu owe justifiable homicide ngoba lokhu kungenzakala umuntu evikela impilo kumbe impahla yakhe.
Kulandela izikhalazo ezakhwezwa emthethwandaba yinhlanganiso ye Women of Zimbabwe Arise, bekhonona ngesimo esisemajele amapholisa athi lawo alesifiso sokuhlanza zizitokisi kodwa awalamali.
Ukuze sihlaziye loludaba uSithandekile Mhlanga weStudio 7 uxoxe loMnu. Believe Gaule, owayeyisiphathamandla sedale lephalamende eyayibona ngokulotshwa kwesisekelo sombuso iCOPAC, yena othi kufanele kuhlonitshwe imbono eyaqoqwa ebantwini.
Ekhuluma ngodaba lweziphathamandla zamankampani kahulumende ezazihola imali ephezulu okwesabekayo, uMnu. Nzombe uthe amapholisa awalamandla okubopha lababantu ngoba iholo labo lavunyelwana le board yamankampani la.
Uchasisile ukuthi esinye saleziziphathamandla, uMnu. Happison Muchechetere owayesebenza kumsakazo weZBC wabotshelwa udaba olwehlukileyo kancane; olokungethembeki