amalinks wokungena

Breaking News

Amaqembu AkumaLower Divisions: Lathi Siyayifuna Imali yeFIFA


Zimbabwe Football Association

Inhlanganiso eqondisa umdlalo wenguqu eyeZimbabwe Football Association ngeviki eyedluleyo yazise ukuba izakupha amaqembu adlala esigabeni se Premier Soccer League inkulungwane ezinhlanu ezilamakhulu amahlanu zamadola ase Melika.

Lokhu kuza ngemva kokuba inhlanganiso ye ZIFA iphiwe imali yinhlanganiso ye FIFA kanye leye CAF eyokuphathisa amaqembu omdlalo wenguqu ngesikhathi umhlaba uhlaselwe ngumkhuhlane we Covid 19.

Linhlanganiso kayisatshongo ukuba izaphathisa lamaqembu adlala ezigabeni eziphansi ezikumaLower Divisions, kodwa umqondisi weqembu le Ajax Hotspurs uSiphambaniso Dube uthi ulethemba lokuba labo bazaphathiswa.

“Esintwini bathi inhlwa kayibanjwa ngekhanda. Inhlanganiso yeZimababwe Football Association mhlawumbe ilayo indlela ezakhangela ngayo amaqembu adlala kuzigaba eziphansi okokuthi singagijimela ukuthi bakhangele abe PSL kuphela sibe sesizihlabe ngowethu. Yikho ke njengoba ubaba uKamambo ekhulume nge PSL asingakuthathi njengokuthi uqedile kodwa sikuthathe njengokuthi kukhona abakulungiselela amaqembu adlala kuzigaba eziphansi wona avele angelalo losekelo lwezimali,” kutsho uDube.

Intathelizindaba yezemidlalo uNash Mkokwayarira laye uthe inhlanganiso ye ZIFA kumele ikhumbule ukuba akungeke kube le PSL kungela zigaba ezingaphansi kwayo.

Intathelizindaba yezemidlalo uNash Mkokwayarira
Intathelizindaba yezemidlalo uNash Mkokwayarira

“Kuhle ngoba amaqembu azaphathiseka kodwa iqiniso yikuba limali ayiyeneli. Ngokubona kwami inhlanganiso ye ZIFA kumele ithi ngipho ngipho ihlephunele ngitsho lamaqembu adlala kuzigaba eziphansi ngoba phela akungeke kube le PSL kungela abo division one,” kutsho uMkokwayarira.

Inhlanganiso ye ZIFA ithe izaphathisa amaqembu ngemali, iphinde njalo kube yiyo ebhadala indleko zabonompembe kanye lokubhadalela ukuhlolwa kwabadlali ukuba kabalalo yini igciwane le Corona.

Amaqembu abesifazane abadlala umdlalo wenguqu lawo azathola inkulungwane ezingamakhulu amahlanu zamadola aseMelika eyokuwaphathisa.

Imidlalo yenguqu kwele Zimbabwe bekumele iqale ngenyanga kaMbimbitho kodwa yasimiswa ngemva kokuba sekuqhamuke umkhuhlane we Covid – 19 njalo ikhangelelwe ukuba isingaqhubekela phambili ngemva kokutholakala kwemali evele kwabe FIFA kanye le CAF.

Facebook Forum

XS
SM
MD
LG