amalinks wokungena

Breaking News

Imidlalo Yangempelaviki Itshiye Amaqembu Amela iZimbabwe Edanile


Iqembu lenguqu elimela isizwe elama Mighty Warriors

Imidlalo ebikhona ngempelaviki itshiye amaqembu amela ilizwe emidlalweni wenguqu esigabeni sabesifazane lakucele lamajaha aleminyaka engaphansi kwamatshumi amabili lantathu esengozini yokwehluleka ukudlulela phambili emincintisweni aphatheke kuyo ikanti leqembu elimela ilizwe emdlalweni kakhilikithi lalo lithole imbila zithutha kwele Pakistan.

Emdlalweni obusesigodlweni iHarare ngeSonto iqembu lamajaha aleminyaka engaphansi kwamatshumi amabili lantathu libe ngutshiki lobhanqa leqembu labosowabo abe Swaziland kungela qembu elenelise ukulitshayela emambuleni okutsho ukuba iqembu le Zimbabwe kumele linqobe emdlalweni wehlandla lesibili ozakuba khonale eSwazini ensukwini ezilandelayo.

Lawamaqembu aphatheke kumncintiswano wokudinga amaqembu azakuyadlala kumncintiswano we Caf Under 23 Championships ikanti emncintiswaneni wokudinga amazwe azakuyadlala kumidlalo yama Olympics ngomnyaka ozayo iqembu labesifazane elimela ilizwe linqotshwe ngele Zambia nge 2 ka 1 khonale kweleZambia ngeSonto.

Iqembu le Zimbabwe kubikwa likhonone ngomdlali we Zambia uBarbara Banda othole omunye omklomelo waleloqembu besithi ngumfana njalo sekungumlandu wenhlnganiso ye Caf ukuba ixazulule linsumansumane yendaba.

Iqembu le Zimbabwe lilalo ithuba lokudlulela kusigaba esilandelayo uma linganqoba emdlalweni wehlandla lesibili ozakuba kwele Zimbabwe ensukwini ezilandelayo.

Emdlalweni kakhilikithi iqembu elimela ilizwe linqotshwe nge 2 ka nya liqembu le Pakistan kumidlalo ye Twenty20 lapho elitshaywe khona ngama wickets amahlanu kumdlalo wakuqala kwathi kowesibili ladliwa ngama wickets amabili.

Iqembu le Zimbabwe lilakho ukuphindisela njengoba kusukela kusasa ngoLwesibili lawa maqembu ezadibana kumidlalo eyohlobo lwe One Day International.

******************************

Emidlalweni yenguqu eyakwamanye amazwe amaqembu agunyulwe kusigaba saphezulu kweleNgilandi ngathi ele Queens Park Rangers, ele Burnley kanye lele Hull City wona aqede imidlalo esendaweni ezintathu ezingaphansi ekufikeni emaphethelweni kwemidlalo yeligi ngempelaviki edluleyo.

Amaqembu enelise ukuthola ilungelo elokudlala kumncintiswano we Champions League ngathi ele Chelsea, okuyilo eliphakamise isicoco, ele Manchester City eliqede likundawo yesibili, ele Arsenal elikundawo yesithathu kanye lele Manchester United eliphutshe likundawo yesine ikanti iTottenham Hotspur le Liverpool wona azaphatheka kumncintiswano we Europa.

***************************

Kolunye njalo udaba olumayelana lomdlalo wenguqu imidlalo yeviki eyetshumi lanye esigabeni se Castle Premier Soccer League itshiye iqembu leChicken Inn lilokhe likhokhela engalaneni yemlomelo esigabeni lesi.

XS
SM
MD
LG