amalinks wokungena

Breaking News

Amaqembu Labadlali Bakhuthazwa Ukukhulumisana NgamaContracts Asephelile


Soccer Ball

Inhlanganiso yabomdlalo wenguqu, eyeFootballers Union of Zimbabwe ikhuthaza ukukhulumisana phakathi kwabadlali lamaqembu abawadlalelayo phezu kwezivumelwano zomsebenzi esezifike emaphethelweni.

Ukumiswa kwezemidlalo ngenxa yomkhuhlane we Covid 19 sekudale insindabaphenduli emdlalweni wenguqu kwele Zimbabwe phezu kokuba kwenzakalani ngezivumelwano zomsebenzi, ama contract ngesilungu.

Umzekeliso wakuqala ngowabadlali abalezivumelwano zomsebenzi ezifike emaphethelweni ngenyanga kaNhlangula umbuzo kuyikuba bayisimo bani ngoba phela isivumelwano sesifike emaphethelweni kodwa babhadalelwe umsebenzi abangawenzanga kusukela kumiswa imidlalo ngenyanga kaMbimbitho.

Isiphathamandla senhlanganiso ye Footballers Union of Zimbabwe uThomas Sweswe uthi bona bacebisa amaqembu labadlali abakulesisimo ukuba bakhulumisane ukuze kuxazululwe loludaba.

“Ubudlelwano bukamqhatshi lesiqhatshwa iqakathekile kakhulu njalo isifiso sami ngesokuthi amaqembu labadlali abasesimeni lesi behlale phansi bakhulumisane babonisane ukuthi kungenziwani njengoba phela ibhola kalidlalwa. Lapho okungasela khona ukuzwanana balakho ukusithinta abadlali sibonisane labo,” kutsho uSweswe.

Abanye abadlali njalo ngabalezivumelwano zomsebenzi eziphela ekupheleni komnyaka ikanti abanye basasalelwe yiminyaka ethile njalo umbuzo usekutheni nxa umnyaka ungaphela kungazange kudlalwe lumnyaka ubalwa njengokuthi obelesivumelwano eseminyaka emibili uyabe esesalelwe ngumnyaka owodwa kumbe uyabe elokhu esalelwe ngemibili ngoba lonyaka engazange edlale.

Loludaba lukhangelelwe ukuba luhlaziywe kabanzi ensukwini ezilandelayo zinkokheli zomdlalo wenguqu elizweni njalo uSweswe utshayele ihlombe amaqembu ayale elokhu ebhadala abadlali loba nje bebengadlali imidlalo.

“Ngithanda ukubonga amaqembu abhadala abadlali ngesikhathi ndawonye lalawo ayenelise ukungezelela iholo labadlali. Lokhu kutsho ukuba ubudlelwano bamaqembu labadlali bawo busesimeni esihle kakhulu yikho ngithanda ukubabonga,” kutsho uuSweswe.

Inengi lamaqembu adlala kusigaba saphezulu ayenelise ukwala elokhu ebhadala abadlali njalo ele Chicken Inn ngelinye elibikwe ukuba likhuphule iholo labadlali ukuze lihambelane lokukhwela kwentengo yezinto elizweni.

Imidlalo yenguqu elizweni le Zimbabwe imiswe ngenyanga kaMbimbitho ngemva kokuqhamuka komkhuhlane we Covid 19 njalo amathuba okuba kuzadlalwa lonyaka aya elokhu encipha.

Amazwe aphetsheya enelisile ukuphindela enkundleni ikanti laselizweni elingumakhelwane kwele Zambia lakho baphindele enkundleni kuthi laselizweni lase South Africa lakho balungiselela ukuqedisa isizini yalonyaka.

Kwelase Zimbabwe umgoqo yikuba kudingakala amaquba quba emali ukuze kuhlanzwe inkundla kuphinde njalo kuhlolwe labadlali kanye leziphathamandla.

Facebook Forum

XS
SM
MD
LG