amalinks wokungena

Breaking News

Amaqgwetha Amela iZimbabwe Atshaphaza Inotho Yelizwe: Biti


Umphathintambo wezemali uMnu. Tendai Biti uthi ele Zimbabwe lilahlekelwa yimali enengi okwamagama nxa kulotshelwana izivumelwano lamankampani emazweni afuna ukuvula amabhizimusi elizweni ngenxa yokuswelakala kwamagqwetha akhaliphileyo asebenzela uhulumende.

UBiti uthi amanye amankampani emazweni acina ehuquluza inotho yelizwe njengoba amagqwetha kahulumende asebenza ewofisini egqwtha elikhulu likahulumende akaAttorney-General engenelisi ukuhlolisisa okulotshelwana lamankampani la.

Uqhubeke ethi kunje ele Zimbabwe lisanda kulobelana isivumelwano sokwemba iPlatinum leyinye inkampani ebhadale izigidi ezingamakhulu amabili amadollar eMelika kulokuthi ibhadale amabillion angamatshumi amabili amadollar.

Inkampani le ibikwa ithenge indawo enkulu okwamagama elezigidi lezigidi zePlatinum ecatshangelwa ukuthi ingabiza amabillion edlula amatshumi amahlanu amadollar eMelika.

Uphinde wathi okwalotshelwana nguhulumende lamankampani emba amadayimana eMarange kwephula inhliziyo ngoba kuyafana lokuthi ilizwe liyatshontshelwa inotho.

Umnu. Matshobana Ncube ingcwethi kwezomthetho wamankampani uthi ukusilela kwamagqwetha alolwazi olujulileyo ngemithetho yamankampani ewofisini kaAG kubisela ilizwe emuva.

XS
SM
MD
LG