amalinks wokungena

Breaking News

Amasela Ahlomileyo Atshontsha Inhlabathi Elamadayimana eMarange


Amasela athwele umbhobho kanye lamarekeni okutshaya inyoni abikwa etshontshe inhlabathi engakagigwa yamadayimana eyisilinganiso sokungama kilograms azinkulungwane ezingamakhulu amane eMarange esigabeni se Manicaland kunsukwana ezisanda kwedlula.

Amasela la akade ephethe ama AK47 kanye lamarekeni abikwa ehlasele imota ye Marange Resources ekade ithwele inhlabathi le lapho okwenjiwa khona amadayimana.

Abikwa njalo etshaye ngerekeni omunye wabakade belinde imota le lapho ebifele khona ukwenzela ukubethusela.

Amapholisa eManicaland abikwa elokhe edinga amasela antshontshe inhlabathi engaba lamadayimana akade ezalethela ilizwe imali enengi okwamagama.

Amapholisa asadingisisa ukuthi amadayimana asenhlabathini le angaba yimalini.

Akwaziwa njalo lokuthi amasela angene njani lapho okwenjiwa khona amadayimana njengoba kulamasotsha, amapholisa lalabo abakhangelane lezomthetho abaqhatshwe ngamankampani emba amadayimana.

Umsekeli womphathintambo wezemigodi uMnu. Gift Chimanikire uthi akwenzakali ukuthi amasela angene eMarange lapho okwenjiwa khona amadayimana ngenxa yokuthi kugcinwe ngamabutho elizwe njalo kulemitshina ehlolisisa konke okwenzakala emigodini le.

UChimanikire uthi ugatsha lwakhe kalukatshelwa ngesenzakalo lesi esingabe sidalwe yilabo abasebenza emigodini ye Marange. Ingcwethi kwezenotho uMnu. Rejoice Ngwenya uvumelana loChimanikire.

XS
SM
MD
LG