amalinks wokungena

Breaking News

Amathuba eHighlanders Wokuthola Inkezo yePSL Lonyaka Lokhu Encipha


Highlanders Bosso

Amathuba eqembu le Highlanders awokuphakamisa inkezo ye Premier Soccer League lonyaka aya elokhu encipha njengoba seliyehle layahlala kundawo yesithathu engalaneni yemiklomelo ngemva kokunqotshwa elikwenziwe ngele Harare City ngempelaviki edluleyo.

Iqembu le Dynamos lihlezi phezu kwengalane lilemiklomelo engamatshumi amane lantathu (43) kuthi ngemva kwalo kuleqembu le ZPC Kariba lona elilemiklomelo engamatshumi amane lanye (41).

Kundawo yesithathu kuhlezi iqembu le Highlanders lona elilemiklomelo engamatshumi amathathu lathoba munwe munye (39) okutsho ukuba litshiywa ngele Dynamos ngemiklomelo emine.

Wonke amaqembu asedlale imidlalo engamatshumi amabili lantathu (23). Lokhu kutsho ukuba kusele imidlalo eyisikhombisa ukuba imidlalo yeligi ifike emaphethelweni kodwa inengi labalandeli beqembu le Bosso sebehle balahla ithemba lokuba iqembu labo lingahwitha ele Dynamos.

Iqembu le CAPS United likundawo yesine lilemiklomelo elingene leye Highlanders kuthi kundawo yesihlanu kuleqembu le Hwange elilemiklomelo engamatshumi amathathu lesikhombisa.

Kundawo yesithupha kuleqembu le Chicken Inn lona elilemiklomelo engamatshumi amathathu lantathu njalo lilingene ngemiklomelo leqembu le Buffaloes.

Iqembu le FC Platinum lihlezi kundawo yethobaminwe mbili lilemiklomelo engamatshumi amathathu lambili ngemva kwalo kwalo kuhlezi iqembu le Harare City elilemiklomelo engamatshumi amathathu lanye.

Endaweni yetshumi kutholakala iqembu le Chapungu elilemiklomelo engamatshumi amabili lathoba munwe munye lona lilandelwa ngele How Mine elilemiklomelo engamatshumi amabili lathoba minwe mbili.

Kundawo yetshumi lambili kuhlezi iqembu le Triangle elilemiklomelo engamatshumi amabili lesikhombisa njalo lilingene ngemiklomelo leqembu le Black Rhinos.
Iqembu le Shabanie Mine likundawo yetshumi lane lilemiklomelo engamatshumi amabili lesithupha ngaphansi kwalo kuleqembu le Bantu Rovers lona elilemiklomelo elitshumi lesikhombisa kuthi iqembu le Chiredzi yilo elijeke amanye engalaneni lilemiklomelo elitshumi lane.

*******************

Kolunye udaba olumayelana lomdlalo wenguqu iqembu le Kaizer Chiefs liphakamise inkezo yeMTN8 ngempelaviki edluleyo elizweni le South Africa ngemva kokunqoba elikwenze ele Orlando Pirates nge 1 ka nya.

Abadlali abadabuka kwele Zimbabwe abaphatheke kulumdlalo ngabathi uWillard Katsande kanye lo Kingstone Nkhatha.

NgaseNgilandi iqembu le Chelsea lalele phezu kwengalane yemiklomelo loba nje libe ngutshiki lobhanqa lele Manchester City 1 ka 1 lilemiklomelo elitshumi lantathu ngemva kokudlala imidlalo emihlanu.

Ngemva kwe Chelsea kulamaqembu athi iSouthampton kanye le Aston Villa wona alemiklomelo elitshumi.

Elizweni le Spain iqembu le Barcelona yilo elihlezi phezu kwengalane lilemiklomelo elitshumi lambili ngemva kwemidlalo emine okutsho ukuba selinqobe kuyo yonke imidlalo yeligi eliyidlale kulisizini.

Elizweni lamaJelimani iqembu elingadumanga ele SC Paderborn 07 yilo elihlezi phezu kwengalane ngemva kwemidlalo emine lilemiklomelo eyithoba minwe mbili kodwa lilingene ngemiklomelo lamaqembu amathathu agoqela iMainz, TSG Hoffeinheim kanye le Bayern Munich.

KwelamaTaliyana iqembu le AS Roma yilo elihlezi phezu kwengalane yemiklomelo lilemiklomelo eyithoba munwe munye njalo lilingene ngemiklomelo leqembu elihlezi kundawo yesibili ele Juventus.

*************************

Kwezinye indaba zemidlalo umdlali weTennis waseZimbabwe uCara Black uqhubekela phambili esithi kuguga othandayo njengoba ephakamise isicoco kusigaba sabadlala bebabili kumncintiswano we WTA Pan Pacific Open ngoMgqibelo odluleyo.

uBlack ubedlala lo Sania Mirza oyisizalwane selizwe le India.

Unobhala jikelele wenhlanganiso ye African Union Sports Council Region Five Under – 20 Youth Games Regional Organising Committee uMvuzo Mbebe uthi uyasuthiseka ukuba idolobho lako Bulawayo lizenelisa ukuqoqa imidlalo yabasakhulayo ngenyanga kaMpalakazi.

UMbebe ukutsho lokhu ngesikhathi evakatshele ebhukutshweni le City Swimming Pool elalisaziwa ngokuthi kuse Barrow lapho okuzaqhutshelwa khona umncintiswano wokuntsheza.

Ukwakha kulokhu kusasekhatshana ukuphela enkundleni ezitshiyeneyo loba nje ngesikhathi kuphawulwa okusemthethweni kwalimidlalo ezaqhutshwa kusukela mhla zinhlanu kunyanga ka Mpalakazi kusiya mhla zilitshumi lane umphathintambo wezemidlalo lamasiko uAndrew Langa wathi kuzamele indawo zokudlalelwa zibe sezilungile ekupheleni kuka Mpandula.

XS
SM
MD
LG