amalinks wokungena

Breaking News

AmaWarriors aba Ngutshiki Lobhanqa leMorocco Emcintisweni weCHAN


Zimbabwe Warriors
Iqembu elimela ilizwe emdlalweni kanobhutshuzwayo elama Warriors lilahliswe ngabagadli ababuthundu emdlalweni walo wakuqala kumncintiswano we African Nations Championships oqhutshelwa elizweni le South Africa.

Iqembu lama Warriors lihlezi kundawo yesithathu kungalane yesibaya sika Group B ngemva kwemidlalo ebikhona ngeNsonto yona ephele iZimbabwe ibe ngutshiki lobhanqa kungelaqembu elenelise ukulitshayela emambuleni kuthi emdlalweni wesibili iUganda itshaye iBurkina Faso nge 2 ka 1.

Limpumela itshiye iqembu le Uganda lihlezi esiqongweni sengalane lilemiklomelo emithathu ikanti iZimbabwe le Morocco zilomklomelo owodwa ngayinye.

Obukele umdlalo phakathi kweqembu le Zimbabwe lele Morocco kumabonakude uSibonakaliso Ndlovu usole abagadli baleliqembu ethi badlalise amathuba amanengi kabi okulitshayela emambuleni ibhola.

Kusibaya sika Group A iqembu le South Africa yilo elihlezi phezu kwengalane ngemva kokunqoba ele Mozambique nge 3 ka 1 ngosuku lwakuqala lomncintiswano kuthi kundawo yesibili kule Mali yona etshaye I Nigeria nge 2 ka nya ngoMgqibelo.
Namhla kungqikilana amaqembu akusibaya sika Group C lapho okule Ghana, iCongo Brazzaville, iLibya kanye le Ethiopia.
Iqembu leZimbabwe lizadlala umdlalo walo wesibili ngoLwesine lapho elizadibana khona lele Uganda.

Kolunye udaba olumayelana lomdlalo wenguqu owayengumqeqetshi wabonozinti beqembu le Highlanders uTembo Chuma useqhatshwe liqembu elingene lonyaka kusigaba se Premier Soccer League ele ZPC Kariba.
UChuma uphelelwe ngumsebenzi kuqembu le Highlanders ekupheleni komnyaka odluleyo loba nje ebesebenze ngendlela ebukekayo njengoba onozinti bakhe bengene kukhalenda yama Soccer Stars of the Year iminyaka ilandelana.Loba kunjalo uChuma uthi akalibophelanga findo iqembu leHighlanders.

Isikhundla ebesiphethwe nguChuma ku Bosso sithethwe ngunozinti owaduma ebambela iqembu le Highlanders eminyakeni eyadlulayo uPeter Nkomo.
XS
SM
MD
LG