Iqembu elimela ilizwe emdlalweni wenguqu elidume ngegama lokuthi ngamaWarriors linqobe ele Mauritius nge 4 ka nya emdlalweni we African Nations Championship odlalwe ngoMvulo ekuseni.
Limpumela itsho ukuba iqembu lama Warriors selifake unyawo olulodwa kusigaba esilandelayo esomncintiswano we African Nations Championship, kumbe i Chan ngamafitshane.
Lumdlalo bekumele udlalwe ngeSonto kodwa wasudluliselwa phambili ngoba inkundla obekumele kudlalelwe kuyo ibisifana nje lexhaphozi ngemva kokuna kwezulu.
Umdlalo wehlandla lesibili lalumdlalo, ongowesigaba sesibili esomkhankaso wokudinga amaqembu azakuyadlala kumncintiswano wokudinga intshantshu zezwekazi lase Africa, ozaqhutshelwa elizweni lase Cameroon ngomnyaka ozayo, ukhangelelwe ukuba khona ngempelaviki elandelayo enkundleni ye Barbourfields ko Bulawayo.
Imibiko ephuma khonale kwele Mauritius ithi ilizwe leli lidlalise iqembu lalo elamajaha aleminyaka engaphansi kweminyaka engamatshumi amabili okuyinto umdlali webhola osakhulayo uDonald Mhlophe athi aluba leZimbabwe layo ngabe iyayenza.
“Ilizwe le Zimbabwe lalo aluba lidlalise ama Under 23 kulumncintiswano ngoba ngaleyo ndlela lilakho ukubona abadlali abatsha. Amanye amazwe abalisa lelase South Africa vele yikho abakwenzayo,” kutsho uMhlophe.
Umncintiswano we Chan ungenwa ngabadlali abadlala besekhaya njalo imidlalo yangomnyaka ozayo iyabe ingeyesithupha selokhu lumncintiswano wasungulwayo.
Iqembu le Zimbabwe lehluleke ukuyadlala kumncintiswano odluleyo oqhutshelwe kwele Morocco kodwa phambilini kwalokho belifinyelele ukuyadlala kuyo yonke imncintiswano eyake yabakhona. Nxa lingaphumelela ngemva komdlalo wehlandla lesibili iqembu le Zimbabwe lizadlala lelizanqoba phakathi kwele South Africa lele Lesotho kusigaba esilandelayo.
Kusenjalo uhlelo olokuba amaqembu amela amazwe azadlala njani ekusungulweni komkhankaso owokudinga amaqembu azakuyaphatheka kumidlalo yezizwe zomhlaba ezaqhutshelwa kwele Qatar ngomnyaka ka 2022 seluphumile njalo iqembu lase Zimbabwe lizadlala leqembu le Somalia ngenyanga kaMpandula.
Kolunye udaba olumayelana lomdlalo wenguqu iqembu le FC Platinum liyale lilokhu lihlezi phezu kwengalane yemiklomelo kusigaba se Castle Lager Premier Soccer League loba nje linqotshwe nge 1 ka nya ngele Black Rhinos ngoMgqibelo.
Iqembu le FC Platinum okuyilo eliphethe isicoco seligi litshiya iqembu le Chicken Inn, lona elihlezi endaweni yesibili, ngemiklomelo emibili.
Lesisimo singaguquka nxa iqembu le Chicken Inn lingadlala umdlalo walo obekumele liwudlale lele Herentals, wona odluliselwe phambili njengoba iqembu le Chicken Inn lilabadlali abathathu abahambe leqembu lesizwe kwele Mauritius.
Emsileni wengalane lakho akusantshintshanga lutho njengoba iqembu elijeke amanye wonke engalaneni yemiklomelo ele Bulawayo Chiefs lalo lingasadlalanga kungoba iqembu le Highlanders obekumele lidibane lalo lilabadlali abane abayingxenye yeqembu lesizwe ebeliyedlala kwele Mauritius.
