amalinks wokungena

Breaking News

AmaWarriors Asephumile Kumncintiswano weCOSAFA Ngemva Kokutshaywa yiSenegal


Zimbabwe Warriors at a training session in Harare.

Iqembu labesilisa elimela ilizwe emdlalweni wenguqu eleZimbabwe Warriors seliphelelwe ngumphako kumncintiswano walonyaka weCOSAFA ngemva kokunqotshwa kwalo ngeleSenegal nge2 ka 0 ngoLwesibili emini.

Iqembu lamaWarriors liphutshe imidlalo yalo yezibaya lilemiklomelo emibili kumidlalo emine njalo impumela yanamhlanje ilitshiye lihlezi emsileni wengalane yemiklomelo.

Ekhuluma lentathelizindaba ekupheleni komdlalo, umqeqetshi weZimbabwe uZdravko Logarusic uthe iqembu lakhe linqotshwe ngoba abadlali bebekhathele.

“Into ekhona yikuthi namuhla sidliwe ngoba abafana bebekhathele. Yikho sihlohlwe ekupheleni kwehlandla lakuqala lasekupheleni kwehlandla lesibili,” kutsho uZdravko.

“Sileqembu labafana abasakhulayo njalo benze amaphutha amancane adale ukuba sihlohlwe. Lesi kumele kube yisifundo esizakwenza bengayenzi amaphutha afanayo kusasa.”

Phambilini komdlalo lo, bekuvele sekulabanye abakhonona ngendlela iqembu lesizwe elidlala ngayo ngaphansi kobuqeqetshi bukaLogarusic.

Intathelizindaba yezemidlalo uNash Mkokwayarira uthi ukuphuma kwamaWarriors kumncintiswano weCOSAFA ngalindlela kuyayangisa.

“Ukuphuma kwamaWarriors kuCOSAFA kuyinto eyangisayo nxa ukhangela ukuba ilizwe leZimbabwe selike lathatha linkezo kanengi,” kutsho uMkokwayarira. “Lokhu kutshengisele ukungaqoqeki kwabaqeqetshi bethu nxa ukhangela indlela iqembu elidlale ngayo kanye lendlela abadlali abakhethwa ngayo bebizwa kuqembu lesizwe.”

“Sekumele sihlale phansi sibone ukuthi sigalungisisa njani kodwa abaqeqetshi kumele behambe.”

Iqembu leZimbabwe selike lanqoba kumincintiswano yeCOSAFA eyisithupha kodwa uLogarusic uthe yena lumncintiswano ubewusebenzisa njengethuba lokubona abanye abadlali abangavamanga ukuthola ithuba lokudlala.

Lumqeqetshi, oncediswa nguTonderai Ndiraya kanye loLloyd Chitembwe, useqeqetshe iZimbabwe kumidlalo elitshumi lambili njalo wenelise ukunqoba emdlalweni owodwa kuphela.

Ube ngutshiki lobhanqa emidlalweni emine njalo wanqotshwa emidlalweni eyisikhombisa, osokubangele ukuthi abanye bakhonone besithi kumele axotshwe umsebenzi ngoba ekhanya engazi akwenzayo.

please wait

No media source currently available

0:00 0:01:51 0:00

Facebook Forum

XS
SM
MD
LG