amalinks wokungena

Breaking News

AmaWarriors Abhekana Lomqanso Emdlalweni weCHAN leleUganda


Zimbabwe warriors
Iqembu lenguqu elimela iZimbabwe elama Warriors likhanya libhekane lomthwalo ongelula lapho linqikilana lama Cranes akwele Uganda emncintisweni we African Nations Championships emdlalweni ozadlalelwa enkundleni ye Athlone Stadium e-Cape Town kwele South Africa ngoLwesine.

Ama Warriors kumele anqobe emdlaweni wangoLwesine ngoba angayekela ukwenza njalo kuyahle kube ngokweminyaka yonke lapho aphuma emcintisweni lo esigabeni sakuqala sezibaya.

Ukunqoba kwama Warriors ngasikhathi sinye iqembu le Burkina Faso lingnqotshwa emdlalweni walo leqembu leAtlas Lions lakwele Morocco kuzatshiya iqembu leZimbabwe lisesibangeni esingcono esingenza lenelise ukungena esigabeni sama quarter finals alumncintiswano weCHAN.

Lokhu kuzahle kunike leli qembu imiklomelo emine, okutshiya ele Uganda leleMorocco esetshikilisana ukukhipha elinye kulumcintiswano. Ele Burkina Faso nxa lingavele lidliwe kuyakuthi mhlaka 20 Zibandlela lapho selidlala umdlalo walo wokucina leleZimbabwe liyabe lingasela dlabuzane nxa kuyikuthi liyabe selidliwe ngele Morocco emdlalweni wakusasa.

Ukudliwa ngele Uganda kuzakutsho ukubana ama Warriors ayabe esefuna umusa weNkosi ukuze enelise ukungena kuma quarter finals okwakuqala kusukela ngomnyaka ka 2009.

IUganda yiyo ekhokhelayo engalaneni yemiklomelo kulesi sibaya sika group B ngemithathu. Ama Warriors le Morocco elandela ngemiklomelo owodwa ngalinye iqembu kuthike ele Burkina Faso elisemisileni lingela loba owodwa.

Iqembu le Zimbabwe likhangelelwe ukuthola idlabuzane ngabasekeli abasuke eHarare ngamabhasi amabili elubhekise eCape Town ukuya kuba emdlalweni lo.

Umqoqi wenhlelo enhlanganisweni yeZimbabwe Football Association u-Simeon Jamanda uthi abasekeli bomdlalo wenguqu baphuma kubalandeli bamaqembu wonke enguqu awe Zimbabwe adlala esigabeni se Premier Soccer League alitshumi lasithupha njalo abazinikele ukubhadalela indleko yamakhulu amabili lengxenye amadollar-$250 yokuya kwele South Africa.

Umcintiswano we African Nations Championships ungenwa ngamaqembu abunjwa ngabadlali abadlala besekhaya hatshi abadlalela kwamanye amazwe.

Iqembu lika Ian Gorowa lenelise ukudlala kamnandi lapho lidlala lele Morocco emdlalweni walo wakuqala laphanjaniswa nje yikungahlohli laloba uDonald Ngoma edlalise amathuba amanengi wokuhlohla kulumdlalo.

UGorowa wenelise ukudlala imidlalo eyithoba minwe mibili enganqotshwanga kodwa osokudingeka kulumdlalo le Uganda yikuhlohla hatshi kanye kodwa amanengi ama goal ukuze iqembu lakhe liphutshe kuhle kulumncintiswano.

Kolunye udaba oluphathelane lomdlalo wenguqu, idraw yomcintiswano wenkezo yeBob 90 Super Cup yenziwe lamhlanje ekuseni kwanxuswa amaqembu amathathu ukuthi aphatheke abalisa iDynamos, Highlanders le Harare City.

IHighlanders le Harare City azanqikilana esigabeni sama semi finals enkundleni ye Barbourfields mhlaka 16 Nhlolanja, kuthike iqembu eliyanqoba kulowo mdlalo libe selinqikilana leDynamos ku final. IDynamos kayidlali kusemi final lonyaka ngoba iyiyo ephakamise linkezo nyakenye inqoba iBosso.

Umcintiswano wenkezo yeBob Super Cup udlalwa minyaka yonke kuthakazalelwa ilanga lokuzalwa likamongameli Robert Mugabe.
XS
SM
MD
LG