amalinks wokungena

Breaking News

America: Umnotho weZimbabwe Ubulawa Yibutshapha Lenkohlakalo, Hatshi Izijeziso


U.S. Secretary of State Antony Blinken takes part in the Ministerial Conference on Migration at the Foreign Ministry headquarters in Bogota, Colombia, Oct. 20, 2021.
U.S. Secretary of State Antony Blinken takes part in the Ministerial Conference on Migration at the Foreign Ministry headquarters in Bogota, Colombia, Oct. 20, 2021.

Sokuqhamuke ukuphikisana okukhulu phakathi kukahulumende kaMongameli Emmerson Mnangagwa lesigodlo seMelika phezu kwembangela yokonakala komnotho weZimbabwe.

Uhulumende uthi umnotho udilizwa yizijeziso zenotho ezetheswa amalunga eZanu PF lamankampani alobudlelwano lalelibandla ngamazwe afana leMelika leBhilithani.

UMnangagwa ugcizelele amazwi la ngosuku lokukhankasela ukwesulwa kwezijeziso lezi, okulusuku olwahlelwa yinhlanganiso yeSadc.

“Sinanza usuku lwezijeziso lonyaka phansi kwendikimba ethi, ‘Singumngane womuntu wonke njalo asisiso sitha sikazibani,’” kutsho uMnangagwa ekhuluma kumabonakude.

“Ngiyathemba ukuthi ukukhulumisana leEuropean Union kuzaqhubeka kuhle ukuze sibe lobudlelwano obungcono. Ngilethemba njalo lokuthi sizakhulumisana kuhle leMelika. Kodwa siyakusola ukuqheliswa lokuvuselelwa kwezijeziso zenotho. Kuphazamisa imizamo yokuvusela ubudlelwano.”

Kodwa isigodlo seMelika eHarare sethule imbiko enkundleni yeTwitter siwaphikisa amazwi kaMnangagwa sisithi umnotho ubulawa yibutshapha bukahulumende, imisebenzi yenkohlakalo kanye lokungahlonitshwa kwamalungelo kazulu.

Sithe izijeziso lezi ziphazamisa amalunga eZanu PF angamatshumi ayisitshiyangalombili lantathu, 83, lamankampani alobudlelwano lalelibandla angamatshumi phose amane, 47, kuphela.

Lokhu kwenzakala ngesikhathi kulesithunywa seUnited Nations elizweni esinxuswe nguMnangagwa ukuthi sizebona umthelela wezijeziso lezi uhulumende athi zilawo kuzulu makhaza.

Uhulumende uthi kenelisi ukuthuthukisa umnotho lokusungula imisebenzi ngoba izijeziso zimvimba ukwenza amabhizimusi lamanye amazwe, ikakhulu umthetho weZidera owethulwa yiMelika.

Kodwa njengeMelika, usomabhizimusi uMnu Bhekimpilo Sithole uthi inkohlakalo yiyo into enkulu ebulala umnotho weZimbabwe.

“Asikhangeleni ukuthi eMutare khonale okuledayimana kwacatsha imali enganani; khathesi lakho indaba yeCovid sizwe kuthiwa kucatshe izimali njalo kwaxotshwa u-minister,” yiyo i-corruption yona leyo ebulala umnotho,” kutsho uMnu Sithole.

Amazwi akhe agcizelelwe ngunobhala jikelele weZCTU uMnu Japhet Moyo.

“Imali zonke nje eyegolide leyedayimana lemali yezokulima itshabalele phambi kwamehlo ethu siyikhangele, yizo izijeziso lezi. Indlela esibambana ngayo elizweni,” kutsho uMnu Moyo.

Wengeze wathi uhulumende kumele aqede inkohlakalo kanye lokutshontshwa kwenotho yakuleli kuqala nxa efuna ukuvuselela umnotho.

Obona ngobudlelano beMelika lamanye amazwe uMnu Antony Blinken usanda kwethula amazwi laye ekulandela ukuthi izijeziso ezetheswa amalunga eZanu PF ziphazamisa uzulu makhaza.

I-Melika ikubeke sobala embikweni wayo kuTwitter izolo ukuthi izasusa izijeziso lezi nxa labo abazetheswayo bengatshiyana lenkohlakalo njalo sebewahlonipha amalungelo kazulu.

please wait

No media source currently available

0:00 0:05:12 0:00

XS
SM
MD
LG