Inhlanganiso elwela amalungelo emhlabeni jikelele eyeAmnesty International ithi uhulumende weZimbabwe uqhubeke esephula amalungelo oluntu ngendlela ethusayo nyakenye njalo abezomvikela babulale abantu abalitshumi.
Abanye babantu laba babesetheswa amacala okwephula iziqondiso zokuvalwa kwelizwe ngenjongo yokwenqabela umkhuhlane weCovid-19.
Kumbiko ewethule izolo ohlaziya isimo samalungelo emhlabeni jikelele ngo2020, iAmnesty International ithe ababulawa nguhulumende laba bagoqela uBhekani Moyo oweSilobela owadutshulwa ngamapholisa esemzini wakhe, uLavison Moyo owatshaywa ngamapholisa akoBulawayo wabhubha ngemva kwensuku ezine, uPaul Munakopa owadutshulelwa eHillside koBulawayo, uMazwi Ndlovu owatshaywa ngabanakanela ukuthi ngabeZanu PF eBulilima, ukhansila weMDC Alliance eHurungwe uLavender Chiwaya labanye.
I-Amnesty International ithi njalo uhulumende weZanu PF uqhubeke ehlukuluza intathelizindaba, abalwela amalungelo labamabandla aphikisayo abafana loJoanna Mamombe, uCecilia Chimbiri loNetsai Marova ecatsha ngemigoqo yokwenqabela iCovid-19.
Linhlanganiso ithi manengi amazwe asebenzise lumkhuhlane ngendlela efanayo.
Ithe njalo umkhuhlane lo usuveze ukuthi inhlelo zamazwe amanengi zibandlulula abesifazana, iziphepheli, labanye njalo ziyephula amalungelo.
Ugwalo lolu luhambelana lolwethulwe yiMelika kunsukwana ezedluleyo layo ethe eleZimbabwe ngelinye lamazwe ephule amalungelo kakhulu nyakenye.
Ohlaziya ezombusazwe uMnu Mqondobanzi Magonya utshele iStudio 7 ukuthi liqiniso ukuthi uhulumende kaMongameli Emmerson Mnangagwa usebenzise ubhubhane lweCovid-19 ukucindezela abamabandla aphikisayo lokwephula amalungelo kazulu.
Asenelisanga ukukhuluma lomphathintambo obona ngokwethulwa kwemibiko uNkosikazi Monica Mutswangwa. Kodwa uhulumende uhlezi ekulandula ukuthi wephula amalungelo kazulu.