Osanda khethwa ukuba ngumphathintambo wezemali, uMnu. Mthuli Ncube, usekufake sobala ukuba ukuze ilizwe liphume ebunzimeni kumele kususwe imali yohobo lwama bond notes njalo ngokuya kwesikhathi kubuyiselwe idola le Zimbabwe.
Kodwa umbuzo omkhulu obuzwa ngabanengi ngothi; lizavuma na ibandla le Zanu PF ukuthi athathe izinqumo ezinjalo?
UNcube wazise imbono yakhe ngendlela zokuvuselela umnotho welizwe engakakhethwa ukuba ngumphathintambo.
Osomabhizimusi kunye lengcwethi bayavumelana ukuba uNcube ulamacebo akhaliphileyo.
UNcube useke waba ngumsekeli kamgcinisihlalo webhanga le African Development Bank njalo wafundisa emakolitshini aphezulu ngokwezemali
Isiphathamandla seZanu PF, uMnu. David Ndlovu uthi mpela uNcube ufundile njalo ukhaliphile.
Ophatheke kwezombusazwe, uMnu. Matson Hlalo, uthi uhulumende kaMongameli Mnangagwa ukhanya ehlukile kulowakudala ngakho ubona uNcube ezaphiwa ixesha lokufeza izibopho zokuvuselela umnotho.
Le yimbono egcizelelwe nguNdlovu othi uhulumende kaMnangagwa uyazi ukuthi ilizwe liphume ebunzimeni elikubo kumele uhulumende engenqabeli imizamo kamphathintambo wezemali.
UNcube usehle wakhanda insimbi isatshisa ngoba ngoMvulo wahlangana labosomabhizimusi bakoBulawayo kukhulunywa ngodaba lokuvuselela amafekitali avalwayo ko Bulawayo.
