Ngemva kokupha ithemba kwabanengi elizweni uMfundisi Evan Mawarire usuke abanengi bengazi walubhekisa kwele South Africa lapho athi ukhulumisana lezizalwane zeZimbabwe ezikulelo lizwe ngodaba lweZimbabwe.
Kulandele imbiko ebulenjini be Internet ethi uMawarire uthunywe libandla le Zanu PF ukuzacitha usekelo lwamabandla aphikisayo. Kodwa uMawarire ulandule limbiko kungxoxo ayenze leStudio Seven namhla esithi limbiko ingamanga ijonge ukumngcolisa nje kuphela.
Uthi yena njalo ngamanga ukuthi ulubhekise kweleMelika lapho afuna ukuyacela ubuphepheli esithi uzabuyela eZimbabwe kumalanga amalutshwana alandelayo.
Ukuhlaziya loludaba uChris Gande weStudio Seven uxoxe lengcwethi ecubungula ezombusazwe, uMnu. Dinizulu Macaphulana othi engaba eqotho uMawarire kodwa kumele uzulu amkhangel ngamehlo womabili.
UMacaphulana uthi: "Liqiniso ukuthi ipolitiki umhlaba ungaka kuyenzeka ukuthi zikhona izithunywa ezenza ingani zikhokhela abantu bona bemunya uzulu umungula njalo besenzela ukuthi bathathe amehlo abantu bakhangele eceleni kulalapho okumele bakhangel khona."
