Inhlanganiso ebona ngokulondolozwa kwelungelo labathengi eye Consumer Council of Zimbabwe ithi intengo yenyama le khabitshi iqonge ngokuphezu kwamatshumi amathathu amacenti eMelika ngoNhlangula lango Ntulikazi.
Unkosikazi Rosemary Siyachitema umqondisi we CCZ, uthi ukuqonga kwentengo lezi sokwenze ukuthi uzulu atshone njalo ezambeni ukwenzela ukuthengela imuli ukudla okwaneleyo ngenyanga.
Unkosikazi Siyachitema uthi inyama iduliswe yikuswelakala kwenkomo zokuhlaba kuthi-ke intengo ye khabitshi ibangelwe yikuthi isanda kulinywa.
Uphinde wathi intengo yezinye impahla iyancwebeka loba nje inhlawulo yamagetsi, imali yokuhambisa abantwana ezikolo kanye leyezibhedlela iphezulu okwamagama.
Umnu. Themba Dlodlo ingcwethi ecubungula ezenotho utshele uGibbs Dube weStudio 7 ukuthi kuyadula ukupha inkomo ukudla okuhloliweyo ngesikhathi sebusika yikho-ke inyama layo isidula.
