Amafekithali amakhulu ako Bulawayo alungisa impahla yokugqoka lamalembu atshiyeneyo asevaliwe ngenxa yokwehluleka ukuthola imali yokwenza impahla enengi yokuthengisa.
Abazi ngokwenzakalayo bathi inkampani ye Labels Private Limited ivaliwe ekuqaliseni kwaliviki kuthi-ke iSecurity Mills (Pvt) Ltd yafakwa ngaphansi komthethwandaba okuthiwa yiJudiciary Management ukuze ibhadale izikwelede zayo.
Inkampani le ilakho njalo ukuvuselelwa nxa umthethwandaba ungaba leqiniso lokuthi isibhadele izikwelede.
Ukuvalwa kwamafekithali la kulandela okwenziwa ngafekithali anjenge Cotton Printers (Pvt) Limited, National Foods (Pvt) Ltd lamanye ambalwa avala kulelidolobho avulwa eHarare.
Lokhu sokutshiye izisebenzi ezinengi zingela msebenzi. Umqondisi we Zimbabwe National Chamber of Commerce uMnu. Trust Chikohora uthi ukuvalwa kwamankampani la kungabe kubangelwa yikuswelakala kwemali yokwenza impahla yokuthengisa kanye lempahla etshiphileyo ethengiswa eZimbabwe evela kwele China le Dubai.
Ingcwethi kwezenotho uMnu. Rejoice Ngwenya uthi manengi amafekithali azavala nxa kungelamithetho ezakwenza ukuthi ancintisane lempahla evela kwamanye amazwe.
Asevalile Njalo Amabili Amafekithali KoBulawayo
- Gibbs Dube
