Isikhulumeli sebandla leZanu PF, uMnu. Simon Khaya Moyo uthi uMongameli Emmerson Mnangagwa kunye lohulumende wakhe, abalani lokenza lemizamo yokuyagebha amathambo kamuyi, uMnu. Robert Mugabe ukuthi ayengcwatshwa kutsha emathuneni eHeroes’ Acre.
UMoyo wethule lamazwi la emhlanganweni lentathelizindaba ngemva komhlangano wedale elimqoka elebandla leli ele politburo eHarare izolo.
UMoyo uthi labo baluzwa kumaphephandaba lemisakazo loludaba njengaye wonke umuntu.
Induna uZvimba owemanweni wako Zvimba lapho okudabauka khona uMugabe wagweba uNkosikazi Grace Mugabe inkomo ezinhlanu lembuzi eyodwa ngokuncwaba uMugabe emzini wakhe.
UNkosikazi Mugabe wayemele eyothoniswa ngeviki edluleyo kodwa kazange aye kudale lenduna ngoba ebikwa engaphandle kwelizwe.
UZvimba wathatha isinqumo sokuthi uMugabe kumele agejwe engcwabeni elavitshwa ngesamende lensimbi.
UMoyo uthi obengunobhala obona ngokuqoqwa kwenhlelo zebandla leZanu PF, uMnu. Victor Matemadanda usezakuyamela ilizwe eMozambique.
Ozakuba ephethe isikhundla soqoqa inhlelo nguMnu. Patrick Chinamasa.
UMoyo uthi owayengumsekeli kamongameli welizwe, uMnu. Kembo Mohadi usephiwe isikhundla sokuqoqa inhlelo zebandla esigodleni sebandla eHarare.
Ingcwethi ecubungula ezombusazwe, uMnu. Thandeko Zinti Mkandla utshele iStudio 7 ukuthi kulihlazo elikhulu okufuna ukwenziwa kuMugabe.
