amalinks wokungena

Breaking News

Asilani Lomhlangano weSummit for Democracy: Kutsho AbeZanu PF


Uzulu wehlukana ngemibono edabeni lokunganxunswa kukamongameli Emmerson Mnangagwa emhlanganweni ozakwenziwa ngenyanga kaMpalakazi weSummit for Democracy, wenkokheli yamazwe womhlaba agoqela awezwekazi leAfrica lenhlanganiso ezisebenzisana lozulu, obizelwe ngumongameli Joe Biden weleMelika.

Inkokheli yamazwe angezansi kwezwekazi leAfrica, ibikwa inxusiwe kulomhlangano wensuku ezimbili ozokwenzelwa enkundleni zokukhulumisana zebulenjini kusukela mhla ka 9 kusiya kumhla ka 10 Mpalakazi kodwa uMongameli Emmerson Mnangagwa ubikwa enganxunswanga.

Umqondisi wohlangothi lwezokukhitshwa kwemibiko ebandleni elibusayo leZanu PF uTafadzwa Mugwadi utshele intathelizindaba izolo emhlanganweni owenzelwe esigodlweni salelibandla ukuba kabalani lokunxunswa kukamongameli emhlanganweni abavele bengazi ukuthi wenzelwani.

"Asazi lutho thina ngalumhlangano kodwa lifuna ngabe sinxunsiwe kiwo?. Akusi yonke imihlangano okumele siyingene njengelizwe. Ngesikhathi umongameli enxunswa emhlanganweni wase Glasgow, akekho owasibuzayo ukuthi kungani wayenxunsiwe? "

Ingcwethi kwezombusazwe umnumzana Tjenesani Ntungakwa upha umbono wakhe phezu kwalomhlangano ozakhangela ezombuso wentando kazulu.

"Bengikhangela udaba lolu abathu ngolwe Virtual Conference eye Democracy, ludaba olumnandi kakhulu kumbeni ludaba oluqondileyo. Kodwa ke into ekhona ekade ngiyicabanga, udaba olunje kumele lubuye kumbeni lwethulwe yi-United Nations, lube ludaba olwamazwe wonke ayabe emele akhangele khonokho. "

Omunye wabacubungula ezombusazwe enhlanganisweni ye Zimbabwe Democracy Institute - ZDI umnumzana Bekezela Gumbo upha umbono wakhe ngaloludaba.

"At least uMnangagwa ebemele etshengise ukuthi se-serious, ngokukhangela udaba lwamalungelo abantu ikakhulu siqalisa kuGukurahundi. Uyabona ukuthi indlela ayenza ngayo indaba yeGukurahundi, kakhulumi ngayo. Abantu bakhangelele ukuthi bathole i-Compensation, abantu baluza umnotho omnengi, balahlekelwa ngabantu. Abanye, amathambo abola egangeni, abanye bangcwatsha egangeni bahawula. Abantu bafuna ukuthi kulungiswe indaba yeGukurahundi, its the first start etshengisa ukuthi uhulumende kaMnangagwa u-serious ngokuhlonipha amalungelo abantu, amalungelo abantu eMatebeleland, amalungelo abantu beZimbabwe. "

Emazwini amunyethwe yincwadi ebhalwe ngabohlangothi olubona ngezobudlelwano lohulumende ehofisini yomeli weMelika eZimbabwe bathi akukho abangakutsho ngalomhlangano loba ukuthi kungani enganxuswanga uMnangagwa.

Umhlangano lo ubikwa ukhangelelwe ukungenwa yinkokheli yamazwe womhlaba, enxunsiweyo okugoqela eyezwekazi leAfrica kanye leyenhlanganiso ezisebenzisana lozulu ezizimeleyo.

Facebook Forum

XS
SM
MD
LG