Imbiko yokuthi umsekeli kamongameli, uMnu. Emmerson Mnangagwa, waphatheka kunkulumo zokubumba uhulumende womanyano lomkhokheli webandla le MDC-T, uMnu. Morgan Tsvangirai, isidale inkulumo.
Ababili laba bayalandula limbiko ekhitshwe yinhlanganiso yezindaba eye Reuters eyandise ukuloba iqiniso lanxa kuloludaba abanye bathi linhlanganiso ingaba isenge lezimithiyo kuloludaba.
Kodwa asithi kuliqiniso ukuthi uTsvangirai loMnangagwa bayakhulumisana ngasese kungaba nguhulumende ongamukelwa nguzulu na?
Ukuhlaziya loludaba sixoxe lengcwethi ezicubungula ezombusazwe ezimbili - uMnu. Rejoice Ngwenya loMnu. Dinizulu Macaphulana.
UMacaphulana uthe, “Khona nxa kwenzakele akumangalisi ngoba ubunzima akubo uMnu. Emmerson Mnangagwa bungamenza adinge ubudlelwano labangaphandle esenzela ikusasa lakhe kumbusazwe welizwe le Zimbabwe.”
UMacaphulana uthe kuseduzane ukuthi lindaba ibeliqiniso ngoba usehlaselwe ngapha langapha.
UMnu. Ngwenya yena kavumelani lo Macaphulana. Uthe: “Lawo ngibona ungani ngamanga kuphela. Umuntu owe Zanu PF onjengo Mnangagwa akhulume loTsvangirai engakhulumi lo (Joice) Mujuru ubungane bakhona buyabe buvele ngaphi?”
UNgwenya uthe bakhona abakhuluma ngomanyano ongelakhetho kodwa lokhu okukhulunywayo kukhanya kungamanga.
UMacaphulana uthe phakathi kukaMujuru loMnangagwa ubuhlubo bakhona sebonakala.
“Ngingathi ubutha begazi osebabakhona abaphatha ngayo uMujuru kuqala ngaye uSolomon (Mujuru) kusiya kuye uJoice (Mujuru) ukuthi bengakhumisana umlotha kusekhatshana. UTsvangirai lo Mnangagwa bengabambana mhlawumbe ngobuhlobo bebizana ukuthi badabuka kuphi, bezama ukuthi babuthane bethathe umbuso kuMazezuru,” kutsho uMacaphulana.
Uthe lokhu kwengenzakala nxa kulandelwa inkulumo ekhona ethi amaKaranga ayakhala esithi kade avalelwa ngaphandle.
Wengezelele esithi umhlangano wababili laba ungenziwa kakhulukazi ngabavela kumazwe aphetsheya, ama donor abalesifiso sokubona ukuthi ilizwe leZimbabwe lizakuma njani ngemva kumbuso kamongameli Robert Mugabe.
Kodwa uNgwenya uthe ukubambana kwababili laba kungenzakala nxa uMnangagwa engaxotshwa ebandleni le Zanu PF.
“Kodwa mina ngibona angani i-ideology yakhona ekaTsvangirai loMnangagwa lama war veterans ikhatshana kakhulu,” kutsho uNgwenya.
UMacaphulana yena uqhubekele phambili esithi: “Kodwa esimele sikunanzelele yikuthi iseason esikuyo, ngumkhathi wezimanga.”
