amalinks wokungena

Breaking News

Kumangalisa Abantu Ukwala Kuka Trump Ukuthi Unqotshwe NguBiden


UMongameli Donald Trump loMnu. Joseph Biden.

Kulabanye abantu abathi ukwala kuka Mongameli Donald Trump ukwamukela impumela yokhetho kwele Melika sokufana lalokhu okwenziwa ngeyinye inkokheli yamazwe kuzwekazi leAfrica.

Sebebambe owangaphansi abantu bemangaliswa ngokwenzakala eMelika kulandela ukunqotshwa kuka Trump ngosemelele ukungena esikhundleni sikamongameli, uMnu. Joseph Biden, okubandla lama Democrats.

Okwamanje uBiden ulama Electoral Votes afika phose amakhulu amathathu – 290 kuthi uTrump ulangamakhulu amabili lamatshumi amathathu lambili – 232. Onqoba kukhetho lweMelika kumele athole ama Electoral Votes angamakhulu amabili lamatshumi ayisikhombisa – 270.

UNkosikazi Sikhululekile Moyo, ukhansila wakoBulawayo, uthi lokhu okwenziwa nguTrump kuveza ukuba inkokheli kaziphumi lula esihlalweni sobukhosi loba abantu bangaze bakhethe umuntu abamfunayo.

“UTrump ukungavumi ukudliwa kuyasibonisa ukuthi abakhokheli abake babusa abathandi kuvuma impumela ebakhona nxa ukhetho seluthe lwenzakala. Lathi siyakubona kusenzakala eAfrica. Khona kuyinto enhle ukuthi bakufunde ukuthi oyabe ethe wawina bakuvume, kuyimfundiso enhle le eyehlele uTrump ngoba kuyatshengisela ukuthi kule democracy. Kukanti njalo njengomama ngihalalisela umama othe wangena ukuba ngudeputy president, kuyikuthuthukisa lathi omama.”

Lokhu kusekelwe nguMnu. Effort Ncube, oyingcwethi kwezombusazwe, othi isenzo sika Trump sidonsela phansi isithunzi selizwe leMelika.

“Ukwala kuka Mongameli Trump ukwamukela impumela yokhetho kwenza iMelika icine ifana lamanye amazwe alokuxokozela ngemva kokhetho, kudondela phansi isithunzi sayo. Kuyinto embi kakhulu okungamelanga bayivume lakancane yenzeke kusiya phambili. Ubuhle beMelika yikuthi uhulumende wakhona kanye labantu balamandla akulamuntu ongayalela esihlalweni, uzabona uBiden engena esihlalweni uTrump kungakhathalekile ukuthi uthini.”

UNkosikazi Ngangezwe Khumalo uthi kukhanya engani abakubandla lama Republicans abasekela uTrump kabafuni ukulandela imithetho yokhetho.

Lokhu kusekelwa nguMnu. Gabriel Moyo.

UMnu. Sikhumbuzo Mlalazi, olandela ezombangazwe, uthi kuyamangalisa ukuthi abantu bathakazelela ukuqoba kuka Biden. Uthi lokhu akusoze kulethe inguquko eMelika, eZimbabwe lakuwekazi leAfrica.

Uthi kuyamangalisa ukuthi abantu kabazwanga kahle obekukhulunywa nguTrump.

Akwaziwa ukuthi uTrump uzavuma sokutheni ukuthi unqotshwe nguBiden njengoba elokhu emvimba ukuthi alungiselele ukungena esihlalweni sikamongameli. Abasekela uTrump abanjengabalenkethabetshabi, ababizwa ngokuthi yiProud Boys labanye, izolo batshengisele emadolobheni atshiyeneyo beveza ukuthukuthela ngokunqotshwa kwakhe kukhetho. Kodwa ababona ngezombusazwe bathi selidume ledlula, ngakho-ke uBiden uyangena esikhundleni sikamongameli mhlaka 20 ngoZibandlela ngomnyaka ozayo.

Udaba Esilethulwe NguBathabile Masuku
please wait

No media source currently available

0:00 0:04:43 0:00


Facebook Forum

XS
SM
MD
LG