Uhulumende weGabon uthi usebophe amalunga ebutho lakhe amahlanu abezama ukuhluthuna intambo zombuso kuMongameli Ali Bongo walelolizwe yena oyelatshwayo elizweni elingumakhelwane eleMorocco kulandela ukugula kwakhe ngenxa ye stroke kunyanga ezintathu ezedluleyo.
Amasotsha la angene kumsakazo walelolizwe, ethula umbiko wokuthi afuna ukubuyisela umbuso okhululekileyo. Obekhuluma, uLt. Kelly Ondo Obiang ukhuthaze abasakhulayo ukuthi besukume bezilwele njalo lebutho lincedise kulokho abakwenzayo.
Imota ezinkulu lamatanka kubikwa bekubonakala esigodlweni seGabon, iLibreville, ngoMvulo ntambama njalo sokule curfew, kukanti intambo zobulembu be internet beseziqunyiwe.
Umsakazo we Radio France Internationale uthi isotsha lesihlanu, eliphunyuke abanye bebotshwa litholakale licatshe ngaphansi kombheda.
Uhulumende uthi uzadingisisa ngalabo ababikwa bebencedisana lamasotsha la, abagoqela amalunga enhlanganiso ezizimeleyo, amabandla aphikisayo, kanye labanye abakubutho.
Inhlanganiso yomanyano wamazwe akuzwekazi leAfrica, yethule umbiko isola okwenziwe ngamasotsha la, isithi isekela uhulumende weGabon.
Imuli yako Bongo isibuse okweminyaka engamatshumi amahlanu - 50 years - kulelolizwe ngoba umongameli okhona utshiyelwe umbuso nguyise uMnu. Omar Bongo ngomnyaka ka2009. Usanda ukunqoba kukhetho luka 2016, lanxa inengi lisithi lwalulokuqilibezela njalo lungakhululekanga.
Ukuhlaziya loludaba, sixoxe loMnu. George Mkhwananzi, ingcwethi ecubungula ezombusazwe, oqala ngokuqathanisa loludaba lokwenzakala eZimbabwe lapho owayengumongameli uMnu. Robert Mugabe etshiya umbuso.
