Inhlanganiso ezizimeleyo zithi zikhathazekile kakhulu ngembiko ethulwe yiZimbabwe Electoral Commission (ZEC) eyokuthi balutshwana abantu abaphakamela phezulu ukuyabhalisela ukuvota kukhetho oluzayo ngo2023.
Imbiko le iphuma ngesikhathi amabandla ezombusazwe atshiyeneyo ephatheke kwenhlelo zokukhuthaza abantu ukuthi bayebhalisa njalo labeMDC Alliance behamba beqoqodela uzulu ezindlini.
Lelibandla lithi lijonge ukubhalisa abavoti abatsha abayizigidi eziyisithupha, 6 million, kuthi eleZanu PF lona lithi likhangelele ukubhalisa abayizigidi ezinhlanu, 5 million.
Ilunga lenhlanganiso ekhuthaza abasakhulayo ukuthi bayebhalisa eyeUniZim Trust, uMnu Brendan Arnold Malaba, utshele iStudio 7 ukuthi nxa abantu bengasasukumelanga phezulu, lokho kuzabangela ukuthi kwehliswe izigaba edale lephalamende, ama-constituencies, phansi kohlelo lokuwaqoqa kutsha olwe-delimitation.
