amalinks wokungena

Breaking News

Badanile Abalandeli beZimbabwe Warriors Ngokuphunyiswa Kweqembu Leli Emncintisweni oweChan


U-Zdravko Logarusic umqeqetshi weqembu elimela isizwe emdlalweni wenguqu, elamaWarriors
U-Zdravko Logarusic umqeqetshi weqembu elimela isizwe emdlalweni wenguqu, elamaWarriors

Lidanise abalandeli iqembu lomdlalo wenguqu elimela iZimbabwe elama Warriors ngokuphelelwa ngumphako lingazange lithole ngitsho lomklomelo owodwa kumncintiswano we African Nations Championship.

Umlandeli womdlalo wenguqu uWashington Sibanda uthi kuyadanisa ukuba iqembu le Zimbabwe liphenduke umtshatshuzwa kwele Cameroon njalo uthi umlandu uwubeka emahlombe enkokheli yeqembu.

“Singakhangela indlela esidlale ngayo kulumncintiswano kubonise mgceke ukuba sihambe kulumncintiswano singazilolonganga njalo singalungiselelanga okubanzi. Kuyinto elusizi njalo eveza ukuba sisemuva kwezomdlalo wenguqu. Okunye njalo singakhangela indlela umqeqetshi akade emisa ngayo amabhiza akhe enkundleni kutshiye imibuzo eminengi ukubana kungani abanye abadlali abakade bedlale kuhle emdlalweni wakuqala bengasatholanga ithuba lokudlala imidlalo elandelileyo. Sekungaba ngokunye okudale ukuba iqembu lesizwe lingatholi lutho libuye lilengise izandla lisuka khonale kwele Cameroon,” kutsho uSibanda.

Intathelizindaba yezemidlalo uNash Mkokwayarira laye usole kakhulu umqeqetshi weqembu lama Warriors uZdravko Logarusic esithi wehlulekile ukuqhuba umsebenzi awuqhatshelwayo.

“Badlale kubi kakhulu njalo babengakhanyi ukuthi bafuna ukwenzani kumbe bafuna ukudlala njani. Lokhu kutshengisela lokuba indlela okwakhethwa ngayo abadlali layo ibingaqondanga ngoba bebengani bahlangane khonale kwele Cameroon abadlali.

Ngokubona kwami umqeqetshi yena ngokwakhe akaboni lutho sibili, yimpuphuthe. Yebo kambe engabe ephuma khona esilungwini kodwa hayi nxa sikhuluma okwenguqu sikhangela iqembu lakhe elidlale ngayo akumelanga abe ngumqeqetshi weqembu lelizwe.

Ngitsho laku PSL vele akumelanga aqeqetshe,” kutsho uMkokwayarira.

Iqembu le Zimbabwe liphutshe imidlalo yalo kusibaya sika Group A lisemsileni wengalane lingela ngitsho lowodwa umklomelo.

Emdlalweni walo wakuqala linqotshwe nge 1 ka nya ngele Cameroon kwathi kowesibili litshaywe nge 3 ka 1 ngele Burkina Faso, kwasekusithi kowesithathu linqotshwe nge 1 ka nya liqembu le Mali.

Iqembu le Mali yilo eliphutshe lihlezi phezu kwengalane lilemiklomelo eyisikhombisa kusithi ele Cameroon liqede lisendaweni yesibili lilemiklomelo emihlanu.

Limpumela itsho ukuba iqembu le Mali kanye lele Cameroon yiwo asedlulele kusigaba esilandelayo esomncintiswano ikanti ele Zimbabwe kanye lele Burkina Faso, eliphutshe lisendaweni yesithathu lilemiklomelo emine, asephindela ekhaya.

Ezemidlalo siziphiwa nguJoseph Njanji
please wait

No media source currently available

0:00 0:02:10 0:00
XS
SM
MD
LG