amalinks wokungena

Breaking News

Abantu Bahlolwa Imikhuhlane Etshiyeneyo Kungelanhlawulo


Sihlolwa imikhuhlane etshiyeneyo isakhamuzi seRobert Sinyoka.

Izakhamizi ezihlala phandle kwedolobho lakoBulawayo zamukele ngenjabulo uhlelo oluqhutshwa ngabe National AIDS Counicl olokuhlola igazi ukuze kubonakale kumbe zilemikhuhlane enjenge tshukela, amehlo leminye.

Uhlelo lolu luqhutshwa ikakhulu endaweni ezilenani eliphezulu labantu abangabamba imikhuhlane eludubo eZimbabwe.

Abenhlanganiso ezimbalwa ngoLwesithathu bebese Robert Sinyoka lapho abaqhube khona uhlelo lolu.

Abantu bebehlolwe igazi, amehlo, itshukela emzimbeni, basokwa, batholiswa indlela ezehlukene zokwelamisa kahle imuli, batshensiswa indlela zokuthola incwadi zokuzalwa kanye lolwazi lokuphila kuhle kungelambadalo.

Oqhuba inhlelo zeNAC esiqintini seLuveve okukhomidi yeDistrict AIDS Awareness Committte, uNkosikazi Priscilla Mac-Isaac uthe bakubone kufanele ukuba benze lokhu endaweni le.

UMnu. Thomas Nyoni, oyenelise ukuhlolwa imikhuhlane embalalwa kodwa eqale ngegcikwane egazini, uthe lolu luhlelo oluhle.

Inengi labantu belikhala ngokungaboni kahle, njalo abenhlanganiso yeZimbabwe Diabetic Association bethi injongo yabo yikuhlola abantu amehlo letshukela egazini ngoba itshukela lihlasela inqe yisiphi isitho somzimba okugoqela amehlo.
UNkosikazi Sithembiso Dube laye uthe uhlolwe amehlo avele esebona buvilibana.

Osakhulayo uTravita Zikhali uthe balohlelo lokuncedisa abasakhulayo ukuba banathe amaphilisi babakhuthaza njalo ukuthi ukuphila legcikwane lengculaza akusokucina kwempilo.

Abantu abedlula amakhulu amahlanu batholiswe usizo lokuhlolwa lokwelatshwa kungelanhlawulo okutshiye uzulu ecela ukuba iNAC ihlale ibethekelela ngoba kulezi insuku kunzima ukuyabhadalela ezempilakahle emakhilinika, ezibhedlela lakubodokothela elizweni. Inengi labantu lithi alisebenzi njalo alilamali yokuya ezibhedlela njalo isikhathi esinengi sebezithengela imithi.

Facebook Forum

XS
SM
MD
LG