Ilizwe leZimbabwe ngelinye lamazwe alaye abantu ukuba behlale ezindlini ukuze kwenqatshelwe ukumemetheka komkhuhlane we Covid 19 wona odalwa ligciwane le corona.
Lumlayo udale ukuba kuhle kumiswe zonke inhlelo ezemidlalo elizweni njalo umnikazi weqembu lomdlalo wenguqu ele Ajax Hotspurs uSiphambaniso Dube uthi ukuqhamuka kwe Corona kuphazamise kakhulu amalungiselelo abo alonyaka.
“Amalungiselelo ethu aphazamiseke kakhulu. Silesifiso sibili esokuba ngabe siyazilolonga kodwa kuqakathekile ukuba silandele izinqumo zonke ezithethwe ukuze kuvikelwe ukumemetheka komkhuhlane.
Ngithanda ukukhuthaza ukuba wonke nje amalunga akade elungiselela imidlalo yalonyaka asilandeleni izinqumo ezithathwayo nguhulumende singafaki impilo yethu engozini,” kutsho uDube.
Iqembu le Ajax Hotspurs lileqembu elidlala kusigaba se Southern Region Division One Soccer League
Ukumiswa kwezemidlalo lokhu sekudale ukuba abantwana betholakale bedlala imidlalo etshiyeneyo ezitaladeni kungakhathalekile lokuba bengazifaka engozini yokubanjwa ngumkhuhlane.
Umnikazi weqembu le Sunrise elidlala kusigaba sika Division Three uCornelius Gumpo uthi abazali kumele bengavumeli abantwana ukudlalela phandle.
“Esikucelayo njalo esikuxwayisayo kakhulu yikuba sihlaleni ezindlini njengokutsho kwabakhokheli. Akusikho ukuthi kumbe kuthiwa kwenzakala emazweni afana leMelika kuphela kodwa kungathinta loba ngubani. Kubalulekile ukuthi thina njengabazali sixwayise abantwana ukuba behlale ezindlini bebuka umabonakude njalo okuhle yikuba amagetsi silawo kulezinsuku. Yebo kambe kungabadaka kodwa esikucelayo yikuba babekezele bahlale ezindlini,” kutsho uGumpo.
Umnikazi weqembu le Golden White eliselokitshini le New Magwegwe uKhotso Nare uthi okhekhe kumele bakunanzelele ukuba ngokuphuma besiyadlala phandle bafaka imndeni yabo engozini.
“Bantwana dlalelani ezindlini lingadlaleli phandle. Thathani okungamabhola kwenu okwamaphepha lidlalele endlini hatshi ukuyaphandle ngoba impilo iqala kini iphinde iphelele kini. Nxa lifuna impilo iqhubekele phambili kuhle lingadlaleli phandle lapho elingahotsha khona umkhuhlane libe selibuya lawo endlini lizothelela abazali ngoba lizasala lizintandane. Laye lowo mqeqetshi okuphathisa empilweni ungacina umthelela sonke isizwe sitshabalale,” kutsho uNare.
Ilizwe le Zimbabwe lilaye ukuba inengi labantu behlale ezindlini okwamaviki amathathu kusukela mhla zingamatshumi amathathu kunyanga kaMbimbitho kusiyafika mhla zilitshumi lathoba munwe munye kunyanga kaMabasa.
Lesisikhathi siphinde sengezwa ngamaviki amabili ngoba inani labantu asebetholakale belegciwane liyala lilokhu likhuphuka elizweni.