Abalandeli beqembu le Highlanders balinde ukwazi ukuba ngobani abazasebenza lomqeqetshi omutsha waleliqembu uBongani Mafu.
Abaqeqetshi ababikwa beyibo okungakhethwa kubo labo abazasebenza lomqeqetshi weBosso omutsha ngabagoqela u Mandla Mpofu yena obesebenzela iqembu le Bantu Rovers kusizini edluleyo ikanti uke waqeqetsha iqembu le Chicken Inn eminyakeni edluleyo.
Abanye ngabathi u Simba Rusike yena obengumsekeli kamqeqetshi weqembu le How Mine ngesizini edluleyo, uBekithemba Ndlovu owayengumsekeli ka Kelvin Kaindu okweminyaka emibili ikanti nyakenye ubephethe iqembu le Elephants elidlala kusigaba se Southern Region Division One, kanye lo Dazzy Kapenya yena owayengukaputeni weqembu eminyakeni eyadlulayo.
Okungaba ngumgoqo ku Kapenya yikuthi ulesithupha sika Level 3 esokuqeqetsha ikanti inhlanganiso ye Zifa isanda kwethula isinqumo esokuba labo abaqeqetsha amaqembu aku Premier Soccer League kumele babe lesithupha se CAF A kuthi abasekeli babo babe lesithupha sika Level 4
Iqembu le Bosso libikwa lifuna ukuphendukisa emsebenzini umqeqetshi wabonozinti uTembo Chuma yena obesebenzela iqembu le ZPC Kariba ngesizini edluleyo.
Ngesikhathi uChuma ephethe onozinti kuqembu le Highlanders onozinti abathi uAriel Sibanda kanye lo Munyaradzi Diya bangene kukhalenda yama Soccer Star iminyaka ilandelana.
Wenelise ukwenza njalo lalonyaka lapho unozinti weqembu le ZPC Kariba uTendai Hove abe ngomunye wabadlali abangene kukhalenda.
Abase duze laye uChuma bathi utshele inkokheli ze Highlanders ukuba uzaxoxisana lazo ngomnyaka ozayo okungaba ngesinye sezizatho zokuba leliqembu kungani lingahle lazise ukuba ngobani abazasebenza lo Mafu.
*************
Kolunye udaba olumayelana lomdlalo wenguqu iqembu le Chelsea liyale lilokhu likhokhela ngemiklomelo emithathu phezu kwengalane yemiklomelo kwele Ngilandi loba nje libe ngutshiki lobhanqa 1 ka 1 leqembu le Southampton.
Lokhu kungoba iqembu elihlezi ngemva kwalo ele Manchester City lalo libe ngutshiki lobhanqa 2 ka 2 leqembu le Burnley.
Namhla ntambama kudlala iqembu le Liverpool lele Swansea okungumdlalo iqembu le Liverpool lona elingaqhubi kuhle lonyaka okumele linqobe kuwo ukuze likhuphuke engalaleni yemiklomelo njengoba lihlezi kundawo yetshumi njalo litshiywa ngemiklomelo elitshumi lesithupha ngele Chelsea.
****************
Sikhangele umdlalo kakhilikithi:
Inhlanganiso ye Zimbabwe Cricket ibikwa isikhethe owayengumqeqetshi wamaqembu amela amazwe athi ele Sri Lanka, Bangladesh kanye le Pakistan u Dav Whatmore ukuba aqeqetshe iqembu elimela ilizwe le Zimbabwe.
Lokhu kuza ngemva kokukhitshwa esikhundleni okwenziwe uStephen Mangongo ensukwini ezedluleyo njalo uWhatmore nguye ozaqeqetsha iqembu le Zimbabwe emidlalweni yezizwe zomhlaba ezaqhutshelwa emazweni athi ele Australia kanye le New Zealand ngomnyaka ozayo.
UWhatmore oleminyaka engamatshumi ayisithupha yokuzalwa uyisizalwane selizwe le Sri Lanka kodwa ukhulele elizweni le Australia.