Abantwana abane ababhubhe ngeviki edluleyo ngemva kokudubuka kwamafutha ephethulo ebatshisile esitolo abakade belele kuso eTshiphisane eMatopo South bangcwatshiwe ngoLwesithathu khonale eMatopo.
Ummeli we Matopo South edale lephalamende uMnu. Saul Mahalima Ncube, owebandla leZANU PF, utshele iStudio 7 ukuthi imuli yabantwana laba ithole usizo lokungcwaba laba abantwana olugoqela oluvela kumsekeli kamongameli uMnu. Phelekezela Mphoko, yena ovakatshele limuli ngoMvulo.
Ababhubhileyo babalisa izelamani uMbongiseni Dube obeleminyaka emibili, uGugugulethu Dube obeleminyaka eyisitshiyagalolunye, kanye lo Iphithule Dube obeleminyaka elitshumi lanye. Unina wababhubhieyo uNkosazana Siphiwe Dube ubikwa esithi ubevakatshele ekhaya abantwana bakhe baze basale bebhubha.
Omunye obhubhileyo kungozi yinye ngu Thandolwenkosi Bhebhe obeleminyaka emithathu.
Abantwana laba babikwa bebesele loMnu. Limukani Mnguni, oleminyaka engamatshumi amabili, onguye olayithe isitofu esisebenzisa amandla e-gas, waphuza ukusilayitha, okubangele ukuthi iphethulo ebigcinwe kuleyo ndawo ilumathe. UMnu. Mnguni uyelatshwa esibhedlela seUnited Bulawayo Hospitals.
Abakade besemngcwabeni ngumphathintambo kahulumende weMatabeleland South uMnu. Abednico Ncube, uSenator Sithembile Mlotshwa, uMnu. Never Khanye omela iMatopo North edale lephalamende, abantwana besikolo se St. Jesa, kanye loMnu. Mngane Ncube, isiphathamandla seHawkflight Construction, onguye obikwa encedise imuli ngamabhokisi okungcwaba abantwana.
UMnu. Mahalima Ncube ugcizelele ukuthi kufanele abantu befundiswe ngokusebenzisa amandla e-gas ngendlela yokwenqabela ingozi enje.