amalinks wokungena

Breaking News

Bathukuthele Abantu ngoNkosikazi Mugabe


Grace Mugabe

Abamabandla aphikisayo bathi uhulumende kumele amise uhlelo lukaNkosikazi Grace Mugabe olokwabela abasekeli beZanu PF impahla kahulumende egoqela into zokulimisa kanye lokudla.

Lokhu kulandela ukuvuma kukamsekeli kaMongameli uMnu Emmerson edale lephalamende ukuthi impahla le ngekahulumende emele iphiwe uzulu jikelele hatshi abasekeli beZanu PF kuphela.

Uzulu laye uthukuthele esithi uNkosikazi Mugabe kumele avinjwe ukutshaphaza imphahla kahulumende.

"Okwenziwa nguNkosikazi Mugabe lokhu akuvunyelwa phansi kwesisekelo sombuso," kutsho ummeli weKuwadzana East ephalamende njalo elilunga leMDC-T uMnu Nelson Chamisa.

"UNkosikazi Mugabe kayisiso siphathamandla sikahulumende, lilunga leZanu PF kuphela. Ngalokho, kamelanga avunyelwe ukwaba impahla kahulumende eyipha abasekeli bebandla lakhe."

Amazwi kaMnu Chamisa agcizelelwe yisiphathamandla sebandla lePeople's Democratic Party uMnu Fortune Mlalazi.

"Kuyasimangalisa ukuthi uNkosikazi Mugabe unika abantu izinto zikahulumende ngandlela bani yena engayisilo lunga likahulumende," kuchasise uMlalazi.

Kodwa ilunga leZanu PF uMnu David Ndlovu uthe akulalutho olubi ngalokhu ngoba amalunga ebandla lakhe lawo eyizizalwane zeZimbabwe.

Emihlanganweni ayenzayo ezigabeni ezitshiyeneyo, uNkosikazi Mugabe uhamba esabela abasekeli beZanu PF ukudla okugoqela irice, amafutha okupheka, izigqoko, amathalakitha, inhlanyelo, imvundiso lokunye.

XS
SM
MD
LG