Ukufuthelana phakathi kwabasekeli beZanu PF labeMDC-T elokitshini leHopley, eHarare South bekuqhubeka ngoMvulo, kulandela udlakela olube khona phakathi kwamabandla womabili ngempelasonto.
Ibandla leMDC-T lithi belijonge ukwenza umhlangano labasekeli balo kulindawo njalo beliphiwe imvumo ngamapholisa, kodwa laselivinjwa ngabasekeli beZanu PF.
Kulapho ke okuqhamuke khona udlakela kwatshaywana njalo kwadilizwa izindlu.
Lanxa amapholisa ebuyile ukuzelamula, abeMDC-T bathi abencedisana labasekeli beZanu PF ukutshaya abasekeli babo.
Kulomntwana oleminyaka yokuzalwa eyisikhombisa olimeleyo njalo ulaliswe esibhedlela.
Umsekeli wesikhulumeli seMDC-T uNkosazana Thabitha Khumalo usole kakhulu ukuhlaselwa kwabasekeli bebandla lakhe.
"Okusiphazamise kakhulu yikuthi amapholisa ebencedisana labasekeli beZanu PF ukutshaya abasekeli bebandla lethu," kutsho uNkosazana Khumalo.
Imizamo yokukhulumisana lamapholisa kanye lesikhulumeli sebandla leZanu PF uMnu Simon Khaya Moyo yehlule.
