Umbiko okhutshwe ngumqondisi wekhomishini ebona ngezemidlalo eZimbabwe, eye Sports and Recreation Commission, uPrince Mupazviriho, obuqondiswe kunkokheli zalinhlanganiso ezisebenzela ezabelweni ezitshiyeneyo zakwele Zimbabwe, uthi abazatholakala bephatheke kwezemidlalo kumele bemangalelwe emapholiseni.
Umongameli Emerson Mnangagwa, weZimbabwe, ekuqaleni kweviki, ulaye ukuba akusavunyelwa ukuba abantu bebuthane bedlule amatshumi amahlanu, kuyingxenye yemizamo eyokwenqabela ukumemetheka lokuthelelanwa kwegciwane leCoronavirus, njalo labo abazephula lumthetho bazabotshwa.
Ngemva kwalumbiko kamongameli, abazemidlalo etshiyeneyo bathethe isinqumo esokumisa inhlelo zonke zokuzilolonga lokudlala loba nje kubekhona abakade belokhu besithi bazaqhubekela phambili ngenhlelo zabo abafana labenhlanganiso ye National Athletics Association of Zimbabwe (Naaz).
Abe Naaz bebehlele ukuba lezifundo ezifundiswa ngabantu abavela kwamanye amazwe ngenyanga kaMabasa kanye langenyanga Ncwabakazi.
Intathelizindaba yezemidlalo uNash Mkokwayarira uthi umbiko okhutshwe yinhlanganiso ye SRC uzaphathisa kakhulu ekuvikeleni abadlali.
“Kimi ngibona kuyinto enhle ngoba kuzakwenza abantu bangabi lemibuthano okuyinto ezakwenza abadlali bevikeleke. Kuzakupha njalo abadlali ithuba elokutshona lemuli njalo ukuhlala kwabo ngekhaya kungenza labanye abantu befunde kubo ukuba lesi yisikhathi esokuthi bezivikele ngokuhlala ezindlini,” kutsho uMkokwayarira.
Uhulumende welizwe lase Zimbabwe udlulisele phambili ukuqhutshwa kwe Zimbabwe International Trade Fair kanye lomkhosi owokuthakazelela ukuthola kwelizwe uzibuse.
Zombili lezizehlakalo bekumele ziqhutshelwe edolobheni lako Bulawayo.
Imibiko ekhutshwe ngabogatsha olubona ngezempilakahle kwele Zimbabwe uthi sekulabantu abahlanu asebetholakale bele gciwane le Corona okuyilo elidala umkhuhlane we Covid 19.
Loba abezemidlalo bemise inhlelo zabo ukubuthana kwabantu kuqhubekela phambili kusiba khona kwele Zimbabwe uzulu efolele impuphu kanye lamabhasi.