Iqembu le Zimbabwe lichothozwe kakhulu ngabalandeli bomdlalo kanobhutshuzwayo ngemva kokuba libe ngutshiki lobhanqa 0 ka 0 emdlalweni walo wakuqala owesibaya sika Group H kumncintiswano owokudinga amaqembu azafinyelela ukuyadlala kumidlalo eyokudinga intshantshu zezwekazi lase Africa eye Africa Cup of Nations ngomnyaka ka 2021.
Ngalokho ke leliqembu lizadibana lele Zambia kusasa lidinga impumela ezathuthukisa amathuba alo awokuba libe ngelinye lamaqembu azaphumelela ukuyadlala kulumncintiswano we Afcon ozaqhutshelwa elizweni le Cameroon ngomnyaka ka 2021.
Ophethe isikhundla esokuba ngumqeqetshi weqembu lama Warriors uJoey Antipas utshele intathelizindaba zemidlalo phambilini kokusukuma kwaleliqembu lilubhekisa kwele Zambia ukuba kuzamele bebophe ziqine ukuze bethole imiklomelo emithathu.
“Sizabe sidlala singekho ngekhaya yikho ke asisoze sihlasele singagqize qhakala kodwa kumele seluke amasu azasisebenzela njengeqembu njalo abafana bengaba bukhali phambi kwegedi silakho ukuphenduka silempumela enhle, kutsho uAntipas.”
Iqembu le Algeria yilo elihlezi phezu kwesibaya sika Group H lilemiklomelo emithathu ngemva kokuba libhaxabule ele Zambia nge 5 ka nya emdlalweni walo wakuqala kuthi ele Botswana lele Zimbabwe alomklomelo owodwa iqembu ngalinye.
Kusenjalo lokhu kungacaci ukuba yiliphi iqembu elizaphakamisa isicoco seligi lonyaka kwele Zimbabwe ngemva kokuba wonke amaqembu amathathu ahlezi phezu kwengalane ebe ngutshiki lobhanqa kumidlalo ayidlale ngempelaviki eyedluleyo.
Iqembu le CAPS United lihlezi phezu kwengalane lilemiklomelo engamatshumi amahlanu lanhlanu ngemva kokuba libe ngutshiki lobhanqa 2 ka 2 lele Yadah ngeSonto.
Endaweni yesibili kuleqembu le Chicken Inn lona elilemiklomelo engamatshumi amahlanu lantathu njalo elibe ngutshiki lobhanqa 1 ka 1 lele Hwange ngoMgqibelo.
Iqembu le FC Platinum lalo lilemiklomelo engamatshumi amahlanu lantathu njalo lihlezi endaweni yesithathu ngemva kokuba libe ngutshiki lobhanqa 0 ka 0 lele Highlanders ngoMgqibelo.
Kumidlalo emithathu eseleyo iqembu le CAPS United lizadlala lele Dynamos, ele Ngezi Platinum Stars kanye lele FC Platinum.
Iqembu le Chicken Inn lona lizadlala lele Bulawayo Chiefs, ele Herentals kanye lele TelOne kuthi iqembu le FC Platinum lona kumele lidlale lele Chapungu, ele Black Rhinos kanye le CAPS United.
Emsileni wengalane iqembu le Bulawayo Chiefs litshelele layahlala endaweni yesine nxa usuka ngaphansi kwengalane ngemva kokunqotshwa nge 1 ka nya elikwenziwe ngele Manica Diamonds.
Iqembu le Chiefs lilemiklomelo engamatshumi amathathu lanhlanu okulinani eliphethwe liqembu le Herentals lona elihlezi endaweni yetshumi lantathu njalo elinqobe ele Mushowani Stars nge 2 ka nya.
Endaweni yesithathu nxa usuka emsileni kuleqembu le Hwange lona elilemiklomelo engamatshumi amathathu lantathu kuthi iqembu le Yadah lisendaweni yesibili nxa usuka phansi lilemiklomelo engamatshumi amathathu lambili.
Iqembu le Mushowani Stars yilo elijeke amaqembu amanye wonke lilemiklomelo engamatshumi amathathu.
Kumidlalo emithathu eseleyo ukuthi iligi iyefika komlindi uyacina iqembu le Mushowani Stars lizadlala lele TelOne, ele ZPC Kariba kanye lele Yadah.
Ele Yadah lona lizadlala njalo lele Harare City kanye lele Triangle.
Iqembu le Hwange lona lizadlala lele Herentals, ele TelOne, ele ZPC Kariba ikanti livele lilomdlalo okumele liwudlale lele Triangle owadluliselwa phambili.
Abafana be Bulawayo Chiefs bona kuzamele bedlale leqembu le Chicken Inn, ele Highlanders kanye lele Herentals kusithi ele Herentals lona lizadlala njalo lele Hwange kanye lele Chicken Inn.
Amanye njalo amaqembu alokhu elwisa ukusinda ekugunyulweni kusigaba saphezulu ngabalisa ele TelOne, Triangle, lele Harare City njalo ele TelOne lona lizadlala lele Mushowani Stars, ele Hwange kanye lele Chicken Inn ikanti ele Harare City lona kumele lidlale lele Yadah, ele Dynamos kanye lele Ngezi Platinum kubesekusithi ele Triangle kumele lidlale lele ZPC Kariba, ele Yadah, ele Dynamos, liphinde njalo lidlale lomdlalo walo owadluliselwa phambili okumele liwudlale lele Hwange.
Kusenjalo inhlanganiso ye Premier Soccer League isiyethule umbiko othi umdlalo wokudinga intshantshu zalonyaka kumncintiswano we Chibuku Super Cup uzadlalelwa enkundleni ye Barbourfields mhla zingamatshumi amathathu kuyonale inyanga ka Lwezi.
Amaqembu azadibana ngosuku lolu ngabalisa ele Highlanders kanye lele Ngezi Platinum Stars wona adibane emdlalweni weligi ensukwini ezisanda kwedlula umdlalo wafika emaphethelweni zingutshiki lobhanqa 1 ka 1.
